Shillong, Nailur 14: Ka Meghalaya State Senior Athletics Championship 2026 ka la sdang hynne ka sngi Nyngkong ha kaba 267 ngut ki nongïalehkai na baroh 12 tylli ki District ki la ïalum lang ha nongbah Shillong ha ka jingïakhun ban ïoh ïa ka burom katba ki dang sei madan ïa la ka jong ka sap ïalehkai.
Ka Ri-Bhoi ka la lam khmat ïa ka jingkheiñ khur takma ha ka sngi sdang, da kaba jop 6 tylli ki takma ksiar, kawei (1) ka takma rupa bad kawei (1) ka takma rnong. Ka Eastern West Khasi Hills ka bud nadien ha ka kyrdan ba ar da kaba khur 2 tylli ki takma ksiar, kawei ka takma rupa bad 2 tylli ki takma rnong, katba ka West Jaiñtia Hills ka wan ha ka kyrdan kaba lai da kaba khur kawei ka takma ksiar bad 3 tylli ki takma rupa.
ïa kane ka lympung kaba lai sngi lynter la pynlong da ka Meghalaya Athletics Association (MAA) ryngkat ka jingkyrshan jong ka Directorate of Sports and Youth Affairs ka sorkar jylla, ha Sports Authority of India centre kaba don ha NEHU, Shillong.
Kane ka lympung ka la wanphai biang hadien katto katne pateng, ha kaba kaba khatduh la pynlong 18 snem mynshwa, la ong u Vice-President ba rangbah jong ka MAA u bah EMH Passah ha ka jingkren pdiang burom jong u. U la ai khublei kyrpang ïa ka tnad Sports bad ïa ka sorkar Meghalaya kiba la pynlong ïa kane ka lympung ban lah ban ïaid shakhmat. Kane ka lympung ka dei shi bynta jong ka jingïatreilang jong ka MAA bad ka sorkar jylla ha kaba wad ïa ki sap ïalehkai ba tbit hashwa ka 39th National Games jong u snem ban wan, ïa kaba yn pynlong da ka Meghalaya.
Ha ka jingkren jong u kongsan, bah Alertson Nongbri, Director ka tnad Sports Youth Affairs, u la mynjur ba kane ka dei ka por kaba biang bha ban pynkhie im biang ïa kane ka championship. “Kiba kynsai tam na phi kin mihkhmat ïa ka jylla jong ngi ha ka National Games,” u la ong sha ki nongïalehkai.
U bah Nongbri u la kdew ruh ïa ka jingwanrah jong ka Sorkar Jylla ïa ka scholarship programme, ka skhim ai khusnam pisa bad ka jingai kam ai jam ïa ki nongïalehkai kiba jop ha ki rynsan ïakop ba la kham paw. “Ka sorkar ka thmu ban don uwei u nongïalehkai Olympic na Meghalaya ha u snem 2032 bad mano ban long uta u superstar? Dei ma phi,” u la kren sha ki nongïalehkai da kaba bynrap ba ki dei ban angnud kham ïar namar ym don kaei kaei kaba ym lah ban urlong.
Baroh ki don 166 ngut ki shynrang bad 101 ngut ki kynthei kiba la soi kyrteng ban ïashim bynta ha ki 37 tylli ki jait jingïalehkai bapher bapher. Ki don ruh 120 ngut ki technical officials kiba don bynta, kynthup ruh na ka Athletics Federation of India (AFI).
ïa jingsmai na ka bynta baroh ki nongïashim bynta la shim da u nongmareh sprint ka West Jaintia Hills u Renaldi Dhar.
Ka jingkylla ka suiñbneng na kaba shai sngi ha ka por ba sdang sha u slap uba jur ha ki jingïalehkai ba khatduh, ka la pynlong ïa ki nongmareh (shynrang bad kynthei) kiba ïakhun ïa ka phainal ha ka jingmareh kaba 100mitar bad 1500mitar ban tynjuh ïalade hapdeng u slap uba jur.
Ka Monlangki Kyndait jong ka WJH ka la jop ïa ka jingmareh kaba 1500m jong ki kynthei (por pyndep: 5 minit bad 25.86 sekhon), katba u Marshal Wanniang ka EWKH u la khur ïa ka takma ksiar ha ka liang ki shynrang (4 minit 8.29 sekhon). ïa ka takma ksiar ha ka ïakob mareh ba 100m jong ki kynthei la khur da ka Phibakmen Rynghang na Ri-Bhoi (13.07 sekhon), katba u samla Banraplang Lapang (ba dei ruh na Ri-Bhoi) ula khur ïa ka takma ksiar na ki shynrang (11.02 sekhon).
