Shillong, Nailur 06 : Hynne ka Sngi la ïoh ban sdang biang ïa ka lympung lehkai kriket kaba la tip da ka U-19 Girls Inter District Cricket Tournament, ba la pynïaid da ka Meghalaya Cricket Association.
Ki jingïalehkai ba mynta ka sngi la pynïakhun ha ar tylli ki madan, kata ha madan Umbuda kaba ha Ri-Bhoi bad ha Salpara ha North Garo Hills – ha kaba 10 tylli ki synjuk kriket jong ki District kiba don bynta bad ka MCA ki la ïashimbynta.
Haba phai sha ka jingïalehkai na ka thup jong ka Group A, ka kynhun lehkai jong ka Ri-Bhoi District Cricket Association ka la pynliem ïa ka South West Khasi Hills DCA da 8 wicket. Katba haba phai sha kawei pat ka jingïakhun, ka North Garo Hills DCA ka la khur namjop da kaba pynliem ïa ka East Garo Hills DCA da 73 ron.
Ka jingïalehkai kaba nyngkong, ka Ri-Bhoi ka jop ïa ka toss bad jied ban ap shuwa bad ki la lah ban tehlakam ïa ka kynhun ba ïakhun pyrshah da kaba ailad tang 125 ron bad pynhap 4 wicket.
Namar ka jingpynthut jong u slap, la hap ban pynduna ïa ka ron bad over s sha ka 94 ron ban jop na ki 15 over, kaba ka Ri-Bhoi ka lah ban pyndep ban pynsah sa lai bol.
Ka Indariakor K Wanniang ka la pynkut ïa ka inning da kaba kamai 48 ron naki 49 bol da kaba khyrwit haduh 9 tylli ki four na ka bynta ka SWKH. Hynrei ka la shah pynhap noh ha ka Bimla Thakuri kaba la khur 2 wicket da 40 ron, katba ka Anjelica Maring lem bad ka Doilna Martin ki la ïoh ban khur mar shi wicket.
Haba beh ïa ka ron, ka Ankita Sharma ka la pyndep da 37 ron na ki 53 bol khlem shah pynhap ban ïarap ïa ka Ri-Bhoi ban khur ïa ka namjop da 8 wicket. Baroh ki ar wicket jong ka Ri Bhoi ki la shah pynhap lyngba ka run out.
Haba phai sha kawei pat ka jingïakhun, ka bym shah pynthut ha u slap, ka kynhun NGH ka la sdang ban tied nyngkong bad buh ïa ka thong da 148 ron bad shah pynhap 8 wicket na ki 35 over.
Hadien kane, ki la pynhap baroh ki wicket jong ka EGH bad ailad tang 75 ron bad ka namtam ka la leit sha ka Julitha Sangma kaba la khur haduh 7 wicket.
Ka jingïalehkai mynta ka sngi, kan long hapdeng ka West Khasi Hills DCA ka ban sa aireng pyrshah ïa ka Shillong Cricket Association ha kawei ka madan na ka thup jong ka Group B, katba ka South Garo Hills DCA pyrshah ïa ka Tura DCA (Zone 2).
