Shillong, Nailar 08: Kan long kaei kaei kaba phylla ban lap ba ki don haduh 3 tylli ki shrieh kiba la wan mih hapoh ka shnong Riatsamthiah bad ïa kane la lap naduh ka sngi baar ha kaba ki nongshong shnong ki la lap ba kitei ki shrieh kiba la wan na Lawmali ki la rung sha ki ïing ki sem jong ki nongshong shnong ban tuh jhur bad ki marbam kat kaba ki ïoh bad ban bam ïa ki.
Katkum ka jingïathuh ki nongshong shnong la la ong ba naduh ka step sngi baar kitei ki shrieh ki la rung hapoh ka ïing ki briew ban troh bad ban bam ïa u khaw ruh ba that shabar. Ki briew kiba ïohi ïa kine ki shrieh ki la pynpaw ïa ka jingsngewtieng bad hadien ba ki nongshong shnong ki la hylla kitei ki shrieh ki la phet noh sha Lawmali. Na ka liang ki nongshong shnong ka Riatsamthiah ki la hap ban khang bha ïa la ki jong ki ïing ki sem naba tieng ïoh ba kitei ki shrieh kin rung ha ki ïing ki sem jong ki nongshong shnong.
La ïohi ruh ba kitei ki shrieh kiba wan hapoh ka shnong Riatsamthiah ki la ïaid ruh na ki naduh Block 1 sha Block 2 bad ruh ki la ïaid na ki tnum ïing jong ki nongshong shnong.
Halor kane na ka liang jong ki shong shnong ki la kyntu ïa ki nongïalam shnong ba kin pyntip noh sha ki bor ba dei peit ba kin wan ban shim noh ïa kitei ki shrieh bad ba kin buh noh ha ki jaka ba dei peit khnang ba kan ym long ka jingma ïa ki nongshong shnong khamtam eh ha kine ki por ba dang ïaid bha ki khynnah skul.
