Jowai, K.Lyngkot 19: Ki nongïalehkai na ki 11 tylli ki District jong ka jylla ki ban ïashim bynta haka 6th Meghalaya Games ha Jowai ha ka sngi u Blei 19 tarik u Kyllalyngkot 2025 kila wan poi lut ha madan Ladmukhla West Jaiñtia Hills District
Ïa baroh kitei ki nongïalehkai la pdiang sngewbha ïa ki da ki bor pynïaid District ka West Jaiñtia Hills ha ka jingdonlang u Deputy Commissioner bah B. S Sohliya, IAS, Additionally Deputy Commissioner kong D. V Lyngdoh, ryngkat u MLA ka thaiñ bad uba dei ruh u Chairman MUDA ma Wailadmiki Shylla, ki dkhot ka Meghalaya State Olympic Association nalor kiwei de.
Ïa baroh kitei ki nongïalehkai napoh ka jylla la pynpoi suk ïa ki sha manla ki jaka sah jong ki, khnang ba kin ïoh ban pynkhreh ban ïashim bynta ha ki jingïalehkai bapher bapher.
Na ka liang u MLA ma Wailadmiki Shylla ula kyntu jur ïa ki nongshong shnong ka West Jaiñtia Hills District ba kin long kiba pdiang sngewbha ïa baroh kitei ki nongwan ïalehkai shapoh ka District kiban ïashim bynta ha ka 6th Meghalaya Games naduh ka 20 haduh ka 25 tarik u Kyllalyngkot, 2025.
Kiba bun na kitei ki nongïalehkai kila pynpaw ka jingsngewkmen bad ka khmat phuh samrkhie namar ka jingsbun mynsiem bad ka jingieit jong kitei ki nongpdiang sngewbha ïaki bad kymjuh ruh kiba la pynbiang nadong shadong ïa ki jingdonkam jong ki.
