Shillong, Nailar 25: Ki San ngut ki Nongïalam jong ka HNLC kiban ïashim bynta ha ka jingïakren ïasuk bad ki bor sorkar ki la wan poi ha Shillong naduh ka 5 tarik mynta u bnai.
Ïa kane la ïathuh da u Bah Sadon K. Blah, uba long u Ksiang jong ka HNLC haba ïakren bad u Mawphor mynta ka sngi.
Kine ki san ngut kiba la phah da ka Seng ki long u Vice Chairman, Bah Manbhalang Jyrwa, u Political Secretary, Bah Aristerwell Thongni, u Foreign Secretary u Bah Phrangkupar Diengdoh bad arngut ki Personal Security Officer, u Bah Aiborlem Marbañiang bad Bah Storgy Lyngdoh.
U Bah Sadon, u la ïathuh ba kine mynta ki don hapdeng ka jingpeit jingkhmih jong ka sorkar, tangba ka jingpeit kam dei pat kaba pyrkhing ba kin nym mih shano shano ruh, hynrei ki lah ban leit kai sha ïing ruh.
Haba la kylli halor ka rta jong ki, u Ksiang ka HNLC, u la ïathuh ba kine ki san ngut kidei kiba la don ha ka rta kum ma u hi la kumno kumno 40 snem shaneng.
Kine ki la wan ruh ryngkat ki kot ki sla na ka bynta ka jingïakren ïasuk, ïa kaba ka sorkar kam pat buh tarik satia bad ka jingïakren ka lah ban long ha Shillong.
Lah ban kdew hangne ba dei ha kine ki bnai kiba ladep ba ka HNLC ka la pyntip ba ka la ïoh ïa ka jubab na ka sorkar ba ka la pdiang ïa ka jingtyrwa ïaskren ïasuk, ha kaba ka sorkar kala thung ïa u Bah Peter Dkhar, ophisar IAS ba la shongthait kum u Ksiang na ka liang ka sorkar bad ka HNLC pat ka la thung ïa u Bah Sadon K. Blah, President ka Seng HNYF kum u Ksiang ka Seng.
Kine ki arngut ki Ksiang ki la ïakynduh bunsien ryngkat ki nongmihkhmat na ka liang ka sorkar pdeng. Dang shen ha kine ki bnai, u Bah Sadon u la pyntip ba ka sorkar ka la shah ïa ki nongïalam ka HNLC ba kin wan sha India khlem kano kano ka jingpynthut lane kata ka Safe Passage. Hadien kane pat ka HNLC ka la jied ïa ki san ngut ki nongmihkhmat jong ka ban ïashim bynta ha ka jingïakren ïasuk.
