Wan ki Nongthoh khubor na Maharashtra sha Meghalaya kum shi bynta ka Media Tour ba la pynlong da ka PIB Maharashtra
Shillong, Risaw 30 : Ka kynhun ba kynthup 14 ngut ki Nongthoh khubor na Maharashtra mynta ka sngi ki la leit jngoh ïa ka shnong Mawlynnong, kawei na ki shnong ba khuid tam ha Asia.
Ka kynhun ki nongthoh khubor ka la ïaroh ïa ka deiriti bad ka rukom im kaba ïaineh jong ka jylla Meghalaya kaba la don ka jingïahap bad ka mei mariang naduh ki por mynshuwa. Ka kynhun ka la leit ruh sha Shnong-pdeng bad pynlut por harud ka wah Umngot kaba khuid.
Ki nongthoh khubor na ki bynta bapher bapher jong ka Maharashtra ki la wan sha Meghalaya bad Assam naduh ka 29 tarik Risaw 2023 haduh 4 tarik Naiwieng 2023 kum shi bynta ka Media Tour ba la pynlong da ka Press Information Bureau, Maharashtra – Goa, Tnat Information and Broadcasting, Sorkar India.
Ki nongthoh khubor ki la poi ha nongbah Guwahati hynnin ka sngi bad la pdiang sngewbha ha ki dustur tynrai.
Ha ki katto katne sngi ban wan, ki nongthoh khubor kin leit ïakynduh ïa ki kynhun bapher bapher bad ïakynduh ïa ki riewpawkhmat jong ka Assam bad Meghalaya. Ki kynhun bapher bapher ba ki nongthoh khubor kin leit ïakynduh kilong ka Assam Rifles, North East Council, Khasi Autonomous Hill Development Council, Assam Police, Tourism Department, AIIMS -Guwahati, IIT-Guwahati bad kiwei kiwei. Kin ïakren ruh bad ki lad pathai khubor ba don ha ka thain.
Ka Media Tour kadei kaba la thmu ban plie lad ban sngewthuh ïa ki sienjam bapher bapher jong ka sorkar ba la sdang ha ki jylla ka thain shatei lammihngi jong ka Meghalaya bad Assam. Ka thmu ruh ban plie lad ban sngewthuh ïa ka deiriti jong ka thain.
Kum kine ki jingïakren kin ai jingtip ïa ki nongthoh khubor shaphang ki jinglong jingman jong ki briew ka thain, ka ïoh ka kot bad ka imlang sahlang bad ka jinglong ki kam sain pyrthei ha ka jylla bad ki sienjam jong ka sorkar ba ïadei bad ka roi ka par. La kyrmen ba lyngba kane ka tour, kan don ka jingïatreilang kaba jrong samoi hapdeng ki lad pathai khubor bad ki tnat sorkar ha kine ki artylli ki thain ka ban plie lad na ka bynta ka jingïasam jingmut.
La pynlong ïa ka Media tour hapoh ka jingïalam jong ka Jaydevi Pujari Swami, Deputy Director, PIB Mumbai ryngkat ka jingkyrshan jong ka PIB Shillong, PIB Guwahati bad DDK Shillong. Ki kynhun pathai khubor print bad electronic ha ki ktien Marathi, Hindi bad English ki la ïadon bynta ha kane ka Media Tour.