Shillong, Jymmang 28: Ka North-Eastern Hill University (NEHU), Shillong ka la ïoh ïa ka kyrdan kaba 15 kum ka Central University kaba paw ha ka ri baroh kawei katkum ka jingpynbna jong ka Indian Institutional Ranking Framework (IIRF) 2023.
U Prof. Prabha Shankar Shukla, Vice-Chancellor ka NEHU ula ai khublei ïa baroh ki nonghikai, nongtrei bad ki samla pule bad ïa baroh kiba don bynta lang ban sdang pynurlong ïa ka thong ban pynlong ïa ka NEHU kaba yn tip da ka pyrthei baroh kawei.
Ula ong, ka IIRF – 2023 watla kam long kumjuh kum ka NIRF ranking framework, hynrei kadei ka jingïaid shi jam ha kaban ïoh kheit ïa u soh ka jingjop bad ka skulbah kala trei shitom ha kaba ïadei bad kane ka bynta.
“Ka khlam COVID ka la ktah ïa baroh bad kam shym la pyllait ruh wat ïa ki nonghikai. Ka NEHU ruh ka la shah ktah jur bha, hynrei ka jingïoh ïa ka kyrdan kaba 15 haka IIRF Ranking, ka skulbah NEHU ka la nang pynskhem ïa ka kyrdan ka jongka kum ka jaka pule kaba wan shakhmat hapoh ka ri” ong u Vice Chancellor.
U Prof. Shukla ula shimti kum u Vice-Chancellor ka NEHU ha ka por ba ka khlam COVID-19 ka dang jur bha .
Kane ka University mynta ka don bun ki centre katkum ka jingdonkam kane ka juk kaba mynta kum ka Design Innovation Centre, Office of International Affairs, Research and Development Cell, Dr. Ambedkar Centre of Excellence, Bio Incubator Centre, Livelihood Incubation Centre bad ka don ruh ïa ka jingthmu ban sdang noh ïa ka Skill Development Centre.
U Vice-Chancellor ula ong, ba ka University ka la trei shitom ruh na ka bynta ban pynïohkam ïohjam ïa ki samla pule lyngba ka Placement & Training Cell bad ka la lah ruh ban pynlong ïa katei ka prokram ha ka ban ïaleh katba lah ban pynïohkam pynïohjam ïa ki samla pule hadien ba ki la dep ban pyndep ïa ka jingpule jongki na NEHU.
Dang shen ka Dalmia Cements ka la shim da ki samla pule ka NEHU ha kine ki 6 bnai kiba la dep bad na ka liang jong ka emami ruh ka la shim ïa ki samla pule ka NEHU bad kane ka skulbah kala dep ruh ban ïasoi ia ka MoU bad ka Sodexo, kaba dei ka Multinational Company kaba shim ïa ki samla pule na ka bynta ban ïatreilang bad ban thungkam thungjam syndon ïa ki.
U Vice-Chancellor ula ong ba ka thong ba kongsan jong ka University mynta ka long ban ïoh ïa ka kyrdan kaba bha shuh shuh ha ka NIRF Ranking bad ban rah shajrong ïa ka nam jong ka skulbah bad ban shakri ïaka imlang sahlang, ka jylla bad ïa ki samla jong ka thaiñ.
