Shillong, Kyllalyngkot 20: U Match Commissioner jong ka Asian Football Confederation (AFC) u Mindu Dorjee u la ïoh ban wan jurip ïa ka madan ‘Jawaharlal Nehru Stadium’ ha Polo ha ka sngi Nyngkong ban peit bad bishar bñiah ïa ka jinglong ba la pynkhreh jong katei ka madan ban pynlong ïa ka jingïalehkai bar ri, ba kynthup ïa ka AFC Asian Cup 2027 qualifier bad ka jingïalehkai paralok (international friendly) ha u bnai Lber.
Kiba la ïadonlang ha kane ka jingwan jurip ki long u Abhishek Yadav – Senior Manager jong ka All India Football Federation (AIFF) Club Licensing & Competitions, u Bah Hamletson Dohling – President ka Meghalaya Football Association, bad kiwei de ki dkhot jong ka MFA lem bad ki nongpynïaid.
U Dorjee u la sakhi da la ki jong ki khmat ïa kane ka madan ha ka por mynsngi bad kumjuh ruh ha ka por janmiet lyngba ka jingshai jong ki floodlights bad u la leit jngoh ruh ïa ka madan ïalehkai ha North-Eastern Hill University (NEHU) ba la tyrwa ban pynlong kum ka madan kilanmet.
Ha ka jingïalang, u la pynpaw ïa ka jingsngewkmen kaba khraw ïa ka jinglong jingman jong u phlang tynrai (natural turf) ba la siang ïa kane ka madan ha JN Stadium, ki kor pynshai ïa ka madan (floodlight) bad kiwei kiwei ki jingdonkam, ha kaba ki don tang katto katne ki mat kiba dang duna kiba u la pynpaw. Ka madan kilanmet (practice ground) ka donkam ïa ka jingpyntrei hynrei la pynthikna ïa u da u Yadav, ka MFA bad ki paralok ba la ïateh soskular ba kan long kaba la pynkhreh lada ai ïa ka por hapoh kine ki ar bnai.
U Bah Hamletson Dohling u la ai khublei ïa ka Sorkar Jylla kaba la ai jingkyrshan ïa ka jingthmu jong ka MFA ban pynlong ïa kine ki jingïalehkai phutbol ri (international matche). U la bynrap ruh ba ka dei ka jingieid bad ka jingsngewtynnat jong ki paidbah ïa ka phutbol kaba la pynshlur ïa ka AIFF ban kyrshan ïa ka Meghalaya ban pynlong ïa kum kine ka jingïalehkai kiba kongsan.
Lah ban kdew ba ka jingïalehkai jong ka AFC Asian Cup 2027 qualifier kan long ha ka 25 tarik u Lber hapdeng ka India bad ka Bangladesh. Khyndiat sngi suhwa kane kan don ka jingïalehkai paralok hapdeng ka India bad ka Maldives, kaba ailad ïa ki nongkyrshan ba ieid phutbol jong ka jylla ban ïoh mad ïa ar tylli ki jingïalehkai phutbol jong ki ri (international match) ha ka nongbah jong ka jylla.
