Shillong, Nohprah 12 : Ka khlieh duh ne ka Chairperson jongka All India Trinamool Congress (AITC) ka Mamata Banerjee mynta ka sngi ka la wan poi ha kane ka nongbah Shillong bad ka long ka sien ba nyngkong eh ba ka la wan ban ïuhkjat ha kane ka nongbah shwa ka election MLA 2023.
La pdiang sngewbha ïa ka da ki nongkyrshan ka AITC ha ka por ba ka wan poi ha kad liengsuiñ ha Umroi ha ryngkat ka ksing ka dhah. La synran ïa ka da u General Secretary ka AITC u Abhishek Banerjee uba la wan ïuh kjat mynta la lai sien lai wan sha kane ka jylla.
Ha kine ki ar sngi ba kan don ha kane ka nongbah kan leit sha ki prokram bapher bapher ha ka jingsynran lang ki nongïalam ka AITC ha ka jylla ba kynthup naduh u Dr Mukul Sangma, Myntri Rangbah ba rim ka jylla, u President bad Lamphang ba rim ka jylla u bah Charles Pyngrope bad kiwei kiwei ki nongïalam.
Ha ka 13 tarik kan don ka prokram ban ïa kynduh bad ïamir jingmut bad ki nongïalam, nongtrei ka party ha Soso Tham Auditorium, State Central Library. Ha katei ka jingïalang ki nongïalam na kylleng ki district, ki Block Committee, ki dkhot jong ki samla, ki samla pule bad da ki spah ngut ki nongtrei ba shitrhem ka seng kin ïadon byntalang.
Ha kapor janmiet kan don ka jingïadih sha Khristmas bad ki khynnah na ki jaka ri khunswet bapher bapher, ki Rangbah Shnong bad Waheh Shnong na Khasi bad Jaintia, ki riew pawkhmat ha ka imlang ka sahlang ha Windermere Resort, Umpling.
Hadien ba ka la poi ha kadlieng suiñ Umroi u Nongïalam ka AITC Legislature Party bad Nongïalam ka Liang Pyrshah u Dr Mukul Sangma u la ong “ Ngi dap da ka jingsngew khmen bad ka Chairperson ka AITC ka la wan poi ha ka sien ba nyngkong eh ha kane ka nongbah. Ki dkhot bad nongïalam na kylleng ka jylla kin ïoh ban ïa kynduh mar khmat bad ka ha ka jingïalang lashai ka sngi”.
