Wan buh pipe ryngkat ka jingtuid ka um, ym ban shu wan buh ne pyndait khlem ka jingtuid ka um: HFU

Mawkyrwat, ‘Naiwieng, 01: Ka long kaei kaei ka jingpyndiaw mynsiem na ka bynta kiba bun ki nongrep hapoh jong ka dong ka thaiñ Mawkyrwat khamtam eh ki nongrep ha ka thaiñ shilliang um kum ka shnong Pyndenmawramhah, Mawsep, Rangdikhew bad kiwei de ha kaba naduh ki snem kiba la leit da ka jingwan poi jong ka skhim na ka sorkar ban pynpoi um ha ki lyngka kan sa long ka jingkyrkhu hynrei mynta pat ka long da mar khongpong.
U bah Ferdinand Lyngkhoi, President ka Hills Farmers Union (HFU) jong ka Mawkyrwat Block haba kren ha ki lad pathai khubor u la ong ba la wan buh ïa ki pipe um ban pyntuid um ha ki lyngba kba la antad naduh ki snem 2008 hynrei haduh mynta kine ki pipe um ki shu don tang u pipe khlem ka um. Wan buh pipe ryngkat ka jingtuid ka um, ym ban shu wan buh ne pyndait khlem ka jingtuid ka um, u la ong.
U la ong shuh shuh ba na ka liang jong ki nongshong shnong ryngkat ka Hills Farmers Union (HFU) jong ka Mawkyrwat Block ki la buh ka jingkyrpad ïa ka sorkar ba ka dei ban peit lem na ka bynta ka jingeh jong ki paidbah nongrep ha ka dong ka thaiñ namar kane ka skhim jong ka jingpynpoi um ha ki lyngkha rep ka la don la slem bah. Kane ka skhim katkum ka jingïathuh jong u bah Ferdinand Lyngkhoi, President ka HFU, Mawkyrwat Block u la ong ba ka dei naduh ka por ba ka Mawkyrwat ka dang hap lang ha ka Nongstoiñ hapoh Irrigation Department bad na Nongstoiñ ki pashad noh sha ka Mairang Division bad hadien kata ki la aiti noh sha ka Water Resource jong ka Mawkyrwat Division.
Kumta, hadien ba ki la aiti ïa kane hapoh ka Water Resource jong ka Mawkyrwat Division ka la pyndap da ka jingkmen na ka bynta ki paidbah nongrep namar ka la pynjan shuh shuh ïa ki rukom treikam bad kum ki nongrep ruh ki la ïoh ka lad ban ïa kynduh ïa u Executive Engineer jong ka Water Resource ha kine ki snem kiba la leit bad ma u ruh u la kular ban leh ïa kaba donkam ban pynpoi um ha ki lyngkha lyngba ki pipe um kiba la don kumba la kyrpad, hynrei kaba sngewsih ka long ba ki jingkular jong u pat ki long tang ban pynthame ïa ki nongrep lane tang ban shu kular kai khlem da pynsei soh ei ei ruh em haduh mynta.
U la ïathuh ruh ba watla kata ruh, kum ki nongrep hi ki dang don ka jingthrang dik dik ban ïoh ïa kata ka bhah kaba la dep ban mang da ka sorkar ha ka kyrteng jong ka Pyndenmaw-ranghah Watershed, hynrei na ka liang ki paidbah nongshong shnong kiba la shah jer ban pynpoi um ha ki lyngka ki la dih jingkyrmen bad pynpaw ruh ka jingsngewsih namar haduh mynta ym pat poi um wat tang shi jaw ruh na uta u pipe uba la dep ban pyndait naduh tyllong.
Ha kaba ïa dei bad ka jingtang ne ring, u bah Ferdinand u la ïathuh ba dei na ka wah Kynshi ha ka kyrteng jong ka Scheme kaba don ka kyrteng shnong Pyndenmawramhah ha kaba la thmu ban pynpoi um lyngba ki pipe um hapoh ka shnong Rangdikhew, Mawsep, bad ha ki pyntha jong ka Nongsynrieh. Kumta, hadien ba ki la dep ban pynbiang ïa ki pipe um, ka la pynkmen haba la ïoh kum ïa kata ka skhim, pynban haba peit pat kane ka skhim ka dei tang ban pynpoi ïa ki pipe hynrei ym ïa ka um. Ngi donkam ïa ka um lyngba ki pipe, ym pat ban shu buh kai ïa ki pipe tang ban pyni sha ka sorkar ba ïa ka Pyndenmawramhah la dep ban tei da ki phew lak ne da ki klur tyngka ïa ka skhim um ban pynpoi ha ki lyngkha, ong u bah Ferdinand.
Ha kajuh ka por u la kynthoh ruh ba kane ka jingtyrwa jong ka sorkar lyngba ki skhim kiba bun bunsien ka long tang ka jingtyrwa kai ha haw haw bad ka long ruh thik kumba tyrwa mit mit u kpa ïa ki khun bad lada ym wanrah u shu ai daw noh, “ba u la ïap u dkhar”. Kane ka long kaei kaei kaba sngewsih na ka bynta ki paidbah nongrep ha kaba ki jingangnud kiba la slem bah kim poi haei haei ruh. U la ïathuh ba kum ki paidbah ha ka jingleit ban jurip ïa ki pipe um naduh na tyllong haduh ban da poi ha ki shnong, la lap ba bun ki pipe ki la dkut bad bun ruh kim don shuh.
Kumta u la buh ka jingkyrpad ïa ka sorkar ba haba ka ïohi ïa ka jingjynjar jong u nongrep man ka por kaba dei shaphang ka um kum ha kaba rep ïa u kba ha ki lyngkha, haba ri ïa ki syiar, ri ïa ki dohkha, ban ri ïa ki sniang bad kiwei de ki jingrep kiba ai jingmyntoi ïa ki paidbah ka dei ban da wan jngoh bad peit lem markhmat khnang ba ki paidbah nongrep kin nym ïa kynduh jingeh ha kaba ïa dei bad ka um lei lei ha kum kine ki por ba ka mariang ruh ka la sdang ban tyrkhong.
Kaba khadduh u la pynpaw ba da kaba ong, Lada ka sorkar ka shu wan ban buh kai ïa ki pipe ha kine ki jaka bad kiba long ruh ka jingpynthut ha ka ïaid ka ïeng ha kaba wat ki mrad ruh bun kiba la ïap na ka daw jong ka jingsahkut ha ki pipe um, kum ki paidbah nongrep kim banse ban hap ban leh ne shim da kiwei pat ki lynti ban pynkyndit ïa ka sorkar, ong u bah Ferdinand.