Wad shwa ïa ki jingshisha shwa ban kynnoh ingkhong shyllangmat, ong u CEM ïa ka HNLC

Shillong, Naitung 10: U Bah Pynïaid Sing Syiem u Chief Executive Member (CEM) ka Khasi Hills Autonomous District Council (KHADC) haba jubab ïa ka kynhun kiengatiar Hynñiewtrep National Liberation Council (HNLC) u la ong, “Wad shuwa ïa ki jingtip hashuwa ban byrngem ban kynnoh ingkhong shyllangmat ïa Nga”.
Ïa kane u CEM ula kren hapoh ka Dorbar Lyuir ka Council ha ka sngi Balang haba ïashimbynta ha ka jingïatai halor ka jingïakajia kaba mih hapoh ka Hima Sohra namar ka jingai jingpynbna ban pynmih ïa ka Raid Majai.
Lah ban pynkynmaw ba ka Hynñiewtrep National Liberation Council (HNLC) ha ka 4 tarik Naitung, ka la byrngem ïa u CEM ka KHADC ba u dei ban pyndam noh mardor ïa ka jingpynbna (Notification) ba pynmih dangshen kaba ai jingithuh ïa ka Majai kum ka Raid.
“Ka HNLC ka maham ïa u CEM ba u dei ban pyndam noh mardor ïa ka jingpynbna ba dang shen ban ithuh ïa ka Majai kum ka Raid lem kumta, ka Majai kan dei kaba pynïaid da ki hehspah jong ki bar jylla ba ‘Ingkhong shyllangmat” ong u General Secretary -cum-Publicity Secretary ka HNLC Bah Saiñkupar Nongtraw haba bynrap ba ka jingpynbna kum ka Raid ka la pynkmen shikatdei eh ïa ki bar jylla ba sah ha Majai, kiba la lehkmen ïa kane ka jingpynbna da kaba thang bom pataka bad ïashad ïa risa halor kane ka jingpynbna,” ong u CEM.
Haba jubab ïa kane, u CEM ula ong, “Nga kwah ban kyntu ba shuwa ban byrngem, sngewbha wad shuwa kin ïa ka jingtip bad ynda phi la tip ïa ka jingshisha, lada phi byrngem, lada phi ong nga dei u ingkhong shyllangmat ruh ngam sngew eiei”.
“Ban shu kynnoh Ingkhong shyllangmat ka suk eh hynrei ynda ïapeit ïa kine ki kam ba ngi leh hangne, phin kylli ma phi ko HNLC, kham ieid Jaitbynriew ma Nga ne Mano,” ula bynrap.
Shuh shuh u Bah Pynïaid ula ong, “Nga kwah ban phah ïa ka khubor kaba shai ba ngi shong hangne da ka jingsngewkhia bad ka jingkitkhlieh, namar kata aiti ha ngi ka EC bad ka Council ba ngin leh ïa kaei kaba bha tam na ka bynta ki Hima ha kylleng ki jaka”.
Halor ka jingpynsngew ki khun ki hajar ka Hima Sohra ba kim pat sngewbit ban don ka Raid Majai, u CEM ula ong, “Ngi la shimkhia ïa kane bad ngin sa bishar bniah bha ma ngi ïa kaei kaba bha tam bad ngin sa ïasyllok lang bad u MDC ka thaiñ hadien ba kut ka Dorbar Lyuir.”
Ha kajuh ka por, u CEM ula kyntu ïa ka Liang Ïatei (Liang Pyrshah) ba kin ai ai jingmut lem ban pynbeit ïa ki kynrum kynram jong ka Hima Sohra bad ka Majai.
“Ka Majai ka dei ka jaka ba ju mih bha ki kynrum kynram ym tang ha ka por jong nga kum u CEM hynrei wat ha ki snem ba mynshuwa ruh, ka dei kaba ju pynmih jingeh bha”.
U CEM ula pyntip ba ka Hima Sohra dang ha kine ki khyndiat sngi, ka la aipor ïa ka KHADC halor ka jingpynbna ïa ka Majai kum ka Raid bad ong, “Mynta ka Executive Committee jong ka Council ka hap buh por kylla ba hapoh ka 15 tarik Naitung, ka Executive Dorbar ka Hima Sohra ka dei ban phah lut ïa baroh ki dulir/pata khyndew ba ka Hima ka ai sha ki bar jylla ha Majai sha ka Council ba ngin bishar bad leh ïa kaba donkam.”
Haba phai sha ka jingïatai ha ka Zero Hour Notice ba la wanrah da u MDC ka Mawthadraishan u Bah J War bad kaba la ïatai ruh da u CEM barim u Bah T W Chyne, u CEM ka KHADC u la ïathuh ba ka EC kaba mynta ka la pyndam noh ïa ka hukum kaba 6 tarik u Rymphang 2020 kaba la wengnoh ïa ki hukum jong u snem 2019 kaba la khang pyrshah ïa ka jingdie jaka bad kiwei ki kam kiba long pyrshah ïa ka riti dustur bad kaba la pynsuk ruh ïa ka Hima ban die ne ai pata sha ki bym dei ki Khasi bad ha kane ka hukum kaba 2019 kaba la pynim biang mynta u 2024 ha kaba ka hukum naduh kaba 3 haduh kaba 10 ka don ka Raid Majai bad ha u snem 2013 ka la don ka shithi na u Syiem Sohra kaba la jied ïa ka EC jong ka Dorbar Raid Majai bad kaba la pynskhem ha ka 15.03.13.
“Ha ka order jong u snem 2019 ka la don ka jingpyrkhing ïa u Syiem ban ai pata, die jaka bad kiwei kiba pyrshah riti dustur sha ki bar jylla hynrei ka hukum u 2020 pat ka la pynlait luid ïa u Syiem na kitei ki jingpyrkhing bad dei na kane ka hukum ba samih ki Rangbah shnong bar jylla ba shu long hi kiba ai NOC ban ïoh EPIC ki bar jylla, ban thied jaka bad kiwei kiwei kumta donkam ban ithuh biang ïa ka hukum 2019 ban ithuh ïa ka Raid Majai ka ban don la u jong u Sordar Khasi bad une u Sordar um lah ne ïoh bor ban ai jaka sha ki bar jylla khlem ïaid lyngba ka Hima Sohra bad kane ka EC kaba mynta ka khlem pynmih ïa ka hukum ba ka Raid Majai kan ym hab shuh hapoh ka Hima Sohra naba ka jingai Raid kadei ban ïada ïa ka khyndew ka shyiap ban ïada na ki jingsynshar ki dkhar,” ong u CEM ha ka ïingdorbar.