Shillong, Nailar 16: Ka kmie jong ka Samla Irikmen Shabong ka Kong Sherita Shabong kaba dei ba ka shnong Wahlang Madanbitaw ha ka sngi Baar ka la buh ka jingkyrpad ïa ki paidbah ka jylla khamtam eh ïa ki nongïalam seng bhalang, ki heh sorkar bad ïa kito ki riew kylluid mynsiem ba kin ïarap lem da ka pisa khnang ba ka Samla Irikmen Shabong kan ïoh leit shim bynta ha ka International Arm Wrestling Championship ha Turkey kaban long ha u bnai Risaw.
Haba kren sha ki lad pathai khubor ka Kong Sherita ka ïathuh ba ka jinglut jingsep na bynta ka Samla Irikmen ban leit sha ri Turkey kan poi kumba 3.22 lak bad ka la ong ba kane ka jinglut kaba kum ka ïing ka sem kim kot bor shuh ban pynmih na ïing.
Ka Kong Sherita ka la ïathuh ruh ba na ka liang jong ka ka la phah shithi ban pan jingïarap na ka sorkar bad kumjuh na kiwei pat ki tnad treikam bad ki corporation hynrei kam pat shym la ïoh jubab eiei.
“Dei ka jingkut lad kaba pynlong ïa nga kum ka kmie ban kyrpad rit ïa baroh kiba don lad ba phin synïang lem namar nga kum ka kmie ngam kot bor shuh bad lada ngim ïoh jingïarap ngim don da kiwei pat ki lad satang ban pynpep noh ïa ka khun jong nga ban leit shim bynta sha katei ka jingïakop ka ban long naduh ka 14 tarik Risaw bad kan neh kumba ar taïew eiei” ong ka Kong Sherita.
“Ka pisa ngi donkam ban ïoh ha shuwa ka 20 tarik mynta hi u bnai, namar 20 tarik ngin hap thep ïa kane ka pisa” ka la bynrap.
Haba la kylli pat la ka Meghalaya Arm Wrestling Association (AMWA) kan lah ne em ban ïarap bei tyngka ka na ka liang ka Kong Sherita ka la ong ba na ka Association hi kam lah namar kam pat dei ka seng kaba la heh ka pla tyngka.
Ka Kong Sherita ka la ïathuh ba kane ka jingïoh leit shim bynta ka Khun jong ka, ka Samla Irikmen ka dei hadien ba ka la ïoh khur ïa ka takma rnong kaba long ha Hyderabad ha une u bnai ba ladep.
