Shillong, Nohprah 04: Ka kynhun ïalehkai jong ka Meghalaya ka la ïoh ban kyntiew ïa ka namjop kaba nyngkong ha ka lympung lehkai jong ka Vijay Hazare Trophy (domestic men’s one day tournament) ha Jaipur hynnin ka Sngi U Blei, hadien ba pynliem ïa ka Manipur da 33 ron.
Kane ka dei ruh ka sien ba nyngkong ïa ka kynhun kiba la rangbah jong ka Meghalaya
Ka Meghalaya ka la phah ïa ka Manipur ban tied nyngkong hadien ba jop ïa ka toss, hynrei katei ka kynhun kaba dei na kajuh ka thaiñ North East ka la lah ban buh ïa ka thong da 248/9 haduh kaba kut jong ka 50 over. Haba beh ïa ka thong ka Meghalaya kam shym la mad jingeh eiei ruh em, ha kaba ki la kynjoh 171/3 naki 34 over, shuwa ba ka jingïakhun kan shah pynthut ha ka suiñbneng. Katkum ka VJD method (the local alternative to Duckworth-Lewis), ka Meghalaya ka la tam shakhmat ïa ka ron ba donkam da 33 ron.
Na ka liang jong ka Meghalaya, u player ka kynhun ba na bar, u Rajesh Bishnoi u la pyndep ban kawang 10 over bad khur 3/49. U Swarajeet u la khur 2/38 naki 8 over bad u Md Nafees 2/52 naki 10.
Baroh san ngut ki player tied ka Meghalaya ki la lah ban ïalehkaibha, ha kaba u Nakul Verma u la tied 49. U la ïarap kyntiew 56 ron ryngkat bad u Raj Biswa (24) shuwa ban hap u wicket ba nyngkong, katba u Swarajeet u la ïarap 27. Shuwa ba ka Meghalaya kan duh ïa u wicket ba ar ka la kynjoh sha ka115/3 naki 27.1 over. Kane kamut ba ka donkam ban kamai tang 5.80 man ka over ban khur ïa ka namjop, bad lyngba ki 56 ron ba la kamai da u Jaskirat Singh Sachdeva (23 not out naki 19 bol) & u Tanmay Mishra (37 not out naki 26) bad ka kynhun ka la kynjoh sha ka 171/3 naki 34 over shuwa ban shah pynsangeh bad khur jingjop lyngba ka VJD method.
Ka jingïakhun ba khadduh jong ka Meghalaya kan long mynta ka sngi pyrshah ïa ka Hyderabad.
