Nongpoh, Ïaiong 25: Ki bor ba dei khmih ïa ka SOS ha ka ri India ba kynthup ïa u Sumanta Kar CEO, SOS India, ka Anuradha Abrol, CPO, Family Like Care SOS India, u Amar Jyoti Sarmah Village Director ka SOSCV Shillong ki la pynpaw ka jingsngewkmen kaba khraw hadien ka SOS Children Village, Shillong ka la kynjoh 25 snem ka jingïaid lynti wat hapdeng shibun ki jingeh bad ki jingtynjuh haka lynti ïaid ban lum ban lang ban peit bad khmih ïa ki khynnah rit kiba shem jingeh bad kiba wan shisha na ka longiing ba duk ba rangli, ban pynlait na ki na ka jinglong khunswet.
Ha ka jingïakren bad ki lad pathai khubor, ki la ong ruh ba ka SOS Children Village Shillong haki snem ba mynshuwa la shu shong tang ha ka iing wai hynrei da ka jingkyrshan lang ka kti ka mon ka diang jong kiba bun katei ka jaka peit bad khmih ïa ki khunswet mynta ka la roi bad nang kiew shaphrang ban long kum kawei ka shlem ban saiñdur ïa ki hep barit kiba ym don ba peit ba khmih bad sumar ïa ki.
Ki la ong ruh lyngba ka SOS ka la long ka jingkmen ïa kiba bun ki iing ki sem bad ka imlang ka sahlang namar ki jingphohsniew ki la urlong ba ki khynnah kiba donkam shisha ka jingïarap bad ka jingkyrshan.
U Sumanta Kar, CEO ka SOS India u la ong, 25 snem shaneng, ka SOS Children’s Village Shillong ka la shim ïa ka jingkular ba uwei pa uwei u khynnah uba la duh noh ïa ki kmie ki kpa lane kiba la jan duh ïa ka jingsumar kin dang don ka lawei kaba dap da ka jingieid bad ka jingïoh jingïarap lyngba ki prokram bapher bapher naduh ka pule ka puthi tad haduh ba kin da lah ban kyrshan ïalade.
Kitei ki nongïalam ki la ong ruh ha kane ka sngi rakhe Silver Jubilee, ngi sngew sarong ban ïohi ba ki mynsiem kiba donkam shisha ka jingïarap ki ïoh ryngkat ka jingpyndonkam ïa ka sap kyrpang kaba u Blei u la ai haki bad kane ka kyntiew ïa ka longbriew man briew namar kumba long mynta bun hi ki khynnah kiba la pynheh pynsan da ka SOS ki long kiba seisoh haka jingim naduh ka ïohkam ïohjam haki tnad sorkar bad ki kompani bapher bapher.
