Nongpoh, Lber, 08 : Ha ka jingïaid lynti kaba 13 snem ba ki seng bhalang bad ki paidbah ki la dawa ban don noh ka 132 KV Power substation ha Nongpoh bad ka la long pat ka jingkmen ïa ki paidbah ka thaiñ Nongpoh, namar ha ka dorbar mang tyngka 2025, ka sorkar ka la pynbna paidbah ban wan rah noh ïa ka 132 KV Power substation ha Nongpoh na ka bynta ban weng ïa ka jingeh ki paidbah na ka jinglip bording khah khah ha ka thaiñ Nongpoh, kaba dei ka Head quarter jong ka Ri Bhoi District.
Kum ban pynkynmaw, ka jingsdang ban dawa ïa katei ka 132 KV Power Substation ka la sdang naduh u snem 2012, ha ka lama jong ka Co-ordination Committee on Electricity ha Ri Bhoi ba la lamkhmat da u Bah (L) G.H Kharshanlor kum u Chairman bad President ka HNYF Sengkmie ha katei ka por bad u Bah Ferdynald Kharkamni kum u Secretary bad uba bat ruh kum u Secretary ka KSU, North Khasi Hills District Unit lyngba ka Committee ki la aiti ïa ka dorkhas sha u Deputy commissioner ka Ri Bhoi ban dawa ïa ka 132 KV Power Substation ha Nongpoh.
Hapdeng ka jingbteng ban ïai dawa, ym shym la seisoh, ha kaba ka la pynlong ruh ïa ka KSU Nongpoh Circle ha u snem 2022 ban pynkhie im biang ïa kane ka mat da kaba ïaid paidbah ha Nongpoh bad la aiti ruh ïa ka dorkhas sha u deputy Commissioner ka Ri Bhoi ban dawa shim khia sha ka sorkar ban wan rah ïa ka 132 KV Power Substation ha Nongpoh.
Halor kane ka phang, ha u snem 2024 ka seng Hynniewtrep Achik National Movement (HANM), Ri Bhoi District, ha ka jingïalam u Bah Donroio Kshiar kum u President ka la ïakhun ruh ban dawa ïa kane ka 132 KV Power Substation ha Nongpoh, ha kaba ki la leit shaduh u Mhntri ka tnad bording Ilektrik, u A.T Mondal ban dawa ïa ka 132 KV Power Substation ha Nongoh, kaba dei halor ka jingsyrtok ki paidbah na ka jinglip bording ba khah khah ha sor Nongpoh.
Haba sngap ïa kane ka sur ba ki paidbah ki la pynpaw ïa ka jingeh na ka jingshah ktah na ka jinglip bording ba khah khah ha sor Nongoh, ka long ka jingkmen ba u Myntri rangbah ka jylla ha ka dorbar mang tyngka 2025, u la pynbna ba la mang tyngka na ka bynta ka 132 KV Power Substation ha Nognpoh. Ïa kane ka projek yn pyntreikam da ka Meghalaya Power Distribution Corporation Limited (MePDCL) bad ba la khmih lynti ba kane ka 132 KV Power Substation kan weng ïa ka jingeh ki paidbah kiba shah ktah na ka jingbym biang ka bording ilektrik.
Haba pdiang sngewbah ïa kane ka rai jong ka sorkar, u Bah Ferdynald Kharkamni, kum uwei u rangbah ba la don bynta ha kaba ïa khih ban ïoh ïa katei ka projek, u la ong ba ki la bteng ban dawa la bun phew snem mynta bad ka long ka khubor jong ka jingkmen ba ka sorkar ha kaba khatduh ka la sngap ïa ka sur jong u paidbah bad kyrmen skhem ba kane ka projek kan ai jingmyntoi shisha ïa ki paidbah ka thaiñ Nongpoh ban ïoh ïa bording ba thikna ym kum ha ki por ba leit noh ba ki la syrtok shisha na ka jinglip ba khah khah ka bording ilektrik.
U la pynpaw ruh da kaba ong ba ka jingpynbna ka sorkar ban shna noh ïa ka 132/33 KV substation ha Nongpoh, ka dei ka jingjop ki paidbah ka thaiñ Ri Bhoi bad ka jingwan kane ka projek bording ka long shisha ka jingkyrkhu ïa ki paidbah ha baroh ki laing, kaba dei hi da ka jingïadon bynta ki seng bhalang, ki nongïalam shnoing bad ki paidbah kiba la ïa snoh kti lang ha kaba dawa ïa kane ka jingdonkam u paidbah ban ïoh ïa ka bording kaba thikna ha ka thaiñ Nongpoh ha Ri Bhoi District, u la bynrap.
