Jowai, Ïaïong 23: Ka SCA ‘B’ kala lah ban pynliem da 43 ron ïa ka SCA ‘A’ ha kawei na ki jingïakhun jong ka lympung ‘Under-16 Boys Inter District Cricket Tournament 2025 (Zone-1) kaba la long ha ka sngi Balang (23 tarik Ïaïong, 2025).
Ïa kane ka lympung la pynlong daka Meghalaya Cricket Association (MCA) bad la pynïaid ïa ka daka West Jaiñtia Hills District Cricket Association (WJDCA) ha Madan Thad, Mukhla Mission, kaba ha West Jaiñtia Hills District.
Haba phai sha ka jingïalehkai, ïa ka jingkynting pisa (toss) la jop da ka SCA ‘A’ kaba la kam trai ban kawang bol shuwa. Na ka liang jong ka SCA ‘B’ ka la lah ban kamai 196 ron shuwa ban hap lut baroh 10 wiket na ki 40.3 ober.
U Mannan Surana u la long uba kongsan tam ha ka tied hadien ba u la lah ban kynjoh thik ïa ka spah ron (100 ron na ki 96 bol) kiba u la bynrap na kawei ka Six (6) bad 18 tylli ki Fours (4s). Katba na ka liang jong u Anish Kedia u la noh synñiang 31 ron na ki 49 bol, kiba u la bynrap na ki 5 tylli ki Fours (4s). U Krishiv Choudhary, nongkawang ball jong ka SCA ‘A’ ula ïoh ban khur 3 wiket marwei na ki 11 ober.
Namar ka jingpynthut u slap, ïa ka inning tied jong ka SCA ‘A’ lahap ban pynduna ïa ka ober bad ruh ïa ka thong, katta na ka 50 ober sha ka 42 ober bad ka thong ba thymmai ka long 187 ron da ka ba pyndonkam daka DLS Method.
Haba shimti ïa ka pali tied ka SCA ‘A’ ka la lah ban kamai tang 143 ron bad duh noh baroh 10 wiket ha ka 35 ober. U Gautam Paul marwei u la tied 60 ron na ki 105 bol ryngkat bad hynñiew tylli ki Fours (4s). U Samelawan Nongkseh pat u la kamai 27 ron na ki 28 bol ryngkat bad saw tylli ki Four (4s). U Navneet Shah jong ka SCA ‘B’ u la seisoh bha ha ka bowling da kaba ïoh ban pynhap 5 wiket na ki 4 ober.
Ïa ka nam Man of the Match la khur da u Mannan Surana u ba kamai bun run eh na ka SCA ‘B’.
Ka jingïalehkai mynta ka sngi Palei (24-04-2025) kan long hapdeng ka WJHDCA pyrshah ïaka EKHCA naduh ka por 8 baje shiteng mynstep.
