Shillong, Nailur 22: U Co-founder bad managing director jong ka Blind Lead Trust, u Jitendra Dkhar u la phah ka jingujor sha Commissioner of Persons with Disability halor ka jingshah pyndik bad sha leh bakla ha ka sumar sukher kaba u la mad hapoh ka jaka sumar Ganesh Das Hospital.
Katkum ka jingkynnoh u Bah Dkhar, u la ong ba u la shah pynïapher ha kiba bun ki nongtrei kiba kynthup ïa ki doctor bad ki bor pahara katba u dang synran ïa la ka jong ka kurim ka kong, Ridahun Lyngdoh, ban ïoh ki lad jingsumar ha ka 9 tarik mynta u bnai.
U la ong ruh ba u la shah pynleh rain haba ïadei bad ka jingbym lah jong u ban ïohi. “Haba nga kylli shaphang ka jinglong jingman jong ka kurim jong nga nga la shah kyntait, bad nga la shah ktah kti ruh ha ki bor pahara kiba la kynniat ïa nga da ka bor,” u la ong.
U la ong ba ka jingsumar kaba u la ïoh ha kane ka jaka sumar sorkar ka long kaba la pynkheiñ ïa ka hok jong u kum u briew uba don ka jingduna ha ka dkhot met. “Nga ngeit ba kum kine ki jingshah leh ka long kaba ym lah ban pdiang bad nga kyrpad ïa ki bor kiba dei peit ban shim khia ha kaba ïadei bad kane ka jingeh,” u la ong.
U la kyntu ïa commissioner ban peit lem ïa kane ka jingeh khnang ba kan ym wan jia shuh nangne shakhmat.
