Ujor u muktiar sha u Deputy Commissioner halor ka jingsniew palat ka Jowai By Pass

Khliehriat Jymmang 25: Ka jingsniew palat ka surok Jowai By Pass ka la long shaba palat bad dang myn ha u bnai nohprah haduh u bnai rymphang ki contractor jong ka tnat Public Work Department ki dang dep ban maramot pynban kane ka surok mynta ka la julor noh, halor kane u muktiar uba na EJHD, u bah Kynjaimon Amse, u la buh da ka jingthoh ha khmat u Deputy Commissioner ka East Jaiñtia Hills District bad pynpaw ïa ka jinglong jingman katei ka surok.
Utei u muktiar u pynpaw ka jingsngew khia halor ka jingpyntrei tangdep ki contractor jong ka tnat PWD ha kaba tang hapoh kine ki khyndiat bnai ka surok ka la julor noh bad ka jingjulor ruh ka long shaba palat kaba la buh jingeh haduh katta katta ïa ki kali naduh ki kali heh, ki kali rit kiba iaid lyngba na katei ak surok By Pass, u la kynthoh ruh ba u contractor jong ka PWD uba maramot ïa katei ka surok um shym la trei bha ïa ka jingmaramot, nalor ba ka buh jingeh ïa ki nongleit nongwan bad ka shu pynsep ei kai ruh ïa ka pisa jongka sorkar ha kaba maramot ïa katei ka surok, namar ïa kajuh ka surok hap ban maramot man la ka por “Lada u contractor u shna bad maramot bha, ma ngi ruh ngin nym sakhi hi ïa ka jot ka pra jong ka surok” pynpaw u bah Amse ha ka shithi sha u Deputy Commissioner bad kyntu ruh ban shim khia noh kloi na ka bynya ka jingbit jingbiang ki paidbah nongleit nongwan.
U la pynkynmaw ruh ïa ka ka P.I.L No. 16 kaba myn ha u snem 2021 jong u jong u muktiar, u bah Kerlang Ksoo, ha kaba na ka liang ka sorkar ka la shim khia ban maramot bad Ong ban pynbha noh ïa ka surok Jowai By Pass, hynrei sngewsih pat ban iohi ïa ka jinglong jingman ka surok kumba ka long mynta kaba la nang julor shaba palat, kaba dap da ki thliew ba dap um ha surok ha ka por slap bad iaid kali, kane ka paw ba ïa ka surok khlem maramot bha ha kata ka rukom ban bit ban biang ki paidbah.
U tei u muktiar, u la buh ka jingkyntu ïa ka sorkar jylla ba ka dei ban maramot noh mardor ïa katei ka surok Jowai By Pass bad ka Shillong By Pass bad ban leh eiei ïa u contractor uba shimti ban maramot ïa katei ka surok u bym shym la trei ïa ka kam na ka bynta ka jingbit jingbiang ki paidbah ha kajuh ka por u ong ruh ba ka sorkar kan nym lutksan than eh lada ïa ki surok yn maramot bha.
Kumta u la kyntu ïa ka sorkar ba kan tuklar lem halor kane ka mat ba donkam ban bthah ïa ki bor ba dei peit ba kin shim khia lym kumta kin sa don ki ban rah biang iya kane ka ju ka mat sha ka iïng bishar Meghalaya Higha Court bad ong ruh ba na ka liang u bah Kynjaimon Amse un nang iai bud dien halor kane.