Shillong, Naiwieng 12: U nongïalam ka liang pyrshah bad u nongïalam ka TMC u Dr. Mukul Sangma ha ka sngi ba-ar u la phah ka jingujor pyrshah ïa u wei u briew ba u la pynphriang ïa ki video kiba pynjah burom bad kiba wanrah ïa ka jingïa isih ha kaba kane ka la phriang bha ha ki rynsan jong ka social media.
Ha ka shithi ba la phah sha u returning officer, u Sangma u la ong, “Kane ka video kaba la saphriang bha hapoh ka social media, la phah sha nga da ki dkhot jong ka party. Kane ka video ha kaba une u briew um dei satia uba la ithuh da ma nga shimet hynrei u la ai kyrteng da u Fourthligh Ch Marak kumba ka la paw ha ka Facebook page jong u Andresh Chambuong Marak, ha kaba u la kynnoh ba u la ktah kti ïa u ha ka step jong ka sngi baar.”
“Kine ki jingkynnoh ba khlem nongrim bad kiba bakla ki la ktah ïa ka jingmut jingpyrkhat jong nga,” u la ong da kaba bynrap “Kane ka jingkynthoh kaba la wanrah ka jingisih ka la ktah bha ïa ka jingim jong nga khamtam ha kane ka por ba nga dei ban ïalap ïa ka elekshon shiteng samoi ka ban long ha 56-Gambegre (ST) Assembly constituency.”
Na ka liang jong u Sangma u la dawa ba ïa kane ka kam dei ban tohkit katkum ki kyndon jong ka aiñ.
“ïa kane dei ban tohkit katkum ki kyndon jong ka aiñ bad kaei kaba mih na kane ka jingtohkit dei ban pynpaw pyrthei kham kloi khnang ba kan ym ktah ïa ka long rynïeng jong u,” ong u Dr. Mukul ha ka shithi.
