Nongstoiñ, Nohprah, 21: Ki saw seng ba kynthup ïa ka seng WKSU, UHM, MYF bad WYF, ha ka sngi hat majai ki la leit ban ïakynduh bad ai jingthoh hakhmat u Chief Engineer ka tnad PWD, ban ujor halor ki kam beaiñ jong ka rukom siang rong ha ka surok shnong Mawduh ter ter ban leit sha Dewlynnong Nongkhnum.
“Na ka liang u CE PWD ba dei peit ïa ka surok PMGSY, ka surok kaba la sdang pyntrei na ka shnong Nongjyllieh shaduh Weinia Sangriang, u la ong ba un sa shimkhia ban phah jurip ïa ka jingpyntrei torti da u contractor ïa katei ka surok ba leit sha ki jaka jngoh kai pyrthei sha Dewlynnong Nongkhnum”, ong u Bah D.Sun President ka WKSU haba pyntip sha u nongthoh khubor hadien ka jingleit ïakynduh ïa u Chief Engineer.
U la ong ruh, “U Chief Engineer u la kren shai ba ka jingpyntrei ïa ki surok PMGSY, ka dei ban long kaba pyrkhing bha bad dei ban pyntrei katkum ki kyndon ban pyntrei ïa ki surok ha kino kino ki jaka. U la ong un sa shimkhia ïa ka jingdawa jong ki saw seng na ka bynta ka jingbit jingbiang ki paidbah jong katei ka dong bad ka thaiñ”.
“Ha kaba ïadei bad ka jingthmu ai wai sha ki riew shimet ïa ka IB PWD barim jong ka Nongstoiñ EE PWD Division, na ka liang u CE PWD ® u la kren shai ba kam don ei ei kum kata ka jingthmu na ka liang ka ophis jong u. Namar, kam don kano ka jingpynshisha lyngba kino kino jingthoh kiba wan na kano kano ka liang. Hynrei, na ka liang jong ngi ki saw seng, ngin nang ïai khmih bniah halor kine ki mat pynroi na ka bynta ka myntoi lang kiba bun”, u la pynkut.
