Ujor ka KSU sha ka Municipal ba kylla ktem dih drok ka Shelter Home ha Kench’s Trace

Shillong, K’lyngkot, 03: Khasi Students’ Union (KSU) Laban Circle ha ka sngi Balang ka la ujor sha u Chief Executive Officer (CEO) jong ka Shillong Municipal Board (SMB) halor ka jingkylla ktem dih drok bad ktem leh ka awria ka Shelter Home kaba don ha Kench’s Trace.
Dang shen ki dkhot ka seng ryngkat bad ki Pulit ka Laban Police Station ki la hiar ban leit kyndang ïa kane ka Shelter Home ha Kench’s Trace hadien ba la saphriang kawei ka video ha ka rynsan jong ka Social Media halor ki jingdih drok jong ki kynthei bad shynrang ha kane ka jaka bad ha kajuh ka por ba kane ka jaka ka la kylla kum ka ktem dih drok bad ka ktem ki kam leh awria.
Ha ka dorkhas, ka seng ka la pynpaw ba dei na ka liang jong ka Shillong Municipal Board ba kam shym la lah ban peit bniah bad jurip na ka por sha ka por ba kane ka jaka ka la kylla ka ktem ki nongbuaid, ki nongdih drok bad haduh ban kan da kylla ka jaka die met.
Ka Seng ka la dawa ban dei ban buh noh ki nongap pahara (Security Gaurd) ha kane ka jaka ha ryngkat ki nongpeit nongkhmih (caretaker) ban lait na ka jingrung jingmih laitlan. Ka Seng ka la maham ruh ba ym bit ban pynkylla ïa kane ka jaka kum ka ktem ban ïadih kyiad bad bad leh kam awria.
Shuh shuh ka KSU ka la ban jur ruh ba ki don katto katne ki briew kiba sah ha ka Shelter Home kaba dei ka jaka na bynta ki briew ki bym don iing don sem bad ki bym kot bor ha ka kamai kajih, hynrei don pat ki briew kiba don la ka kali kamai, ka kam ka jam hynrei ki sah ha kine ki jaka namarba ki ïoh ei lut nadong shadong haduh ka bam ka dih. Kane pat kan pynduh jaka ïa kito kiba donkam hok ïa kum kine ki Shelter Home. Ka Seng ka la dawa ba ïa kum kita ki briew dei ban pynmih mardor bad dei ban don ki kyndon kiba biang ba ïa kum kino ki jait briew ba lah ban pynrung ha kine ki Shelter Home bad ym dei ba kin lah ban sah shyrta hynrei dei ban buh da ka por ba ynda ki la biang ka kamai ba kin hap ban mih na katei ka jaka.
Ha kajuh ka por seng ka la pynsngew ruh ba ka Dorbar Shnong K.O.R kam shym la ai jingmynjur ban buh ïa ka Shelter Home bad kane ka la mih ha ka por ba la wan shop ka jingpang khlam COVID-19 kum ka Temporary Shelter Centre hynrei mynta pat ka la kylla da kumwei.
“Ka jingbymlah jong ki bor pynïaid ban tehlakam ïa ki briew ba wansah ha Shelter Home ha Kench’s Trace ka buh jingma ïa ki nongshong shnong jong ka thain K.O.R bad Laban ruh kumjuh,” la ong ka Seng.