Shillong, Naitung 26 : Ka Khasi Students’ Union (KSU) ha ka sngi Balang kala ujor da ka ejahar pyrshah ïa ka Twitter Account ha ka kyrteng “Legal Rights Observatory-LRO @LegalLRO” halor ka jingkynnoh ïa ka KSU ba ka kynshoit ban wanrah ïa ka jingsngew ïapher niam na ka jingjia ba jia ha Mahadev Khola myn ha ka Lah Sngi U Blei.
U General Secretary ka KSU samla Donald Thabah ula ong ba kane ka jingkynnoh jong kane ka LRO ka dei ka “Bym shong hok” bad “bym don nongrim”.
“Ka KSU ka la rai ba namar ka jingkhraw palat ka jingkynnoh, ngim banse ban ujor da ka ejahar ha u Superintendent of Police ka Shillong City” ong u samla Donald.
Lah ban kdew ba ka Legal LRO ha ka Twitter ka la kynnoh “Ki runar ka KSU ki la hiarthma ïa ka mandir ka Mahadev Khola, 101 Area, Lower Lawsohtun, Shillong Meghalaya. Ngi lah ban ïohi ïa ki ba ki shoh ïa ki lyngdoh niam, ki riewngeit kynthei kynthup ki bahaïing u lyngdoh niam. Hato ka Balang Presbyterian kan sangeh noh ïa kane ka jingbuh shun?”.
U samla Donald ula ong ba da ka jingkynnoh ïa ka Balang bad ia ka Seng ba donkti ha kum kane ka jingjia ka dei kaba bakla shaba palat. Ula ong ruh ba ka KSU kam don jingïadei satia bad kino kino ki Seng niam hynrei ka KSU ka ïeng na ka bynta ka bha ka miat bad ban ïada ïa ka Jaidbynriew Khasi.
“Ngin (KSU) ym leh satia ïa kino kino ki kam kiba lah ban ktah ïa kano kano ka kynhun niam” ula bynrap.
Ula ong ba dei namar ka jingbym don ka aiñ ban tehlakam ïa ka jingrung kyrthep ki mynder, ka la pynbor ïa ka KSU bad kiwei ki kynhun Sengbhalang ban mih shakhmat ha kaban ïada ïa ka Jaidbynriew Khasi.
Ula ong ruh ba ka jingkynnoh na kane ka Legal LRO ka dei tang ka jingpyrshang ban pynshit ban mih ka jingïakynad hapdeng ki Hindu bad ki riewlum Khristan ym tang ha Meghalaya hynrei ha ka Thaiñ Shatei Lam Mihngi baroh kawei.
“Kaei kaba ki kwah ka long ka jingkyrshan na baroh kawei ka Ri India ba kin pyrshah ïa ki riewlum…kane ka dei kaba bakla, namar ha ka jingïakhih pyrshah ïa ka jingrung beaiñ shapoh ka Jylla, kam shym la don satia kano kano ka khep ba hiar thma ïa ki jaka leh niam” ula bynrap.
