Shillong Nohprah 02: Ka KSU East Jaintia Hills District Unit, ha ka 1 tarik u Nohprah ka la leit ai da ka dorkhast ha u Deputy Commissioner ka District ban leh da kaba tyngeh ïa ka jingshim kabu palat liam jong ki nongdie jingdie hapoh ka District ban pynkiewdor palat pud ïa ki marbam mardih.
Ka seng ka la pynsngew ba ki don katto katne tylli ki dukan kiba shim kabu ïa u paidbah ban die be-aiñ ïa ki marbam mardih bad ka seng ka la dawa na ka bor pynïaid District ba ki dei ban jurip ïa ki dukan kiba die be-aiñ.
Ka seng kala dawa ba dei ban shon da ka muhor ïa ki mawthew kilo, ki dukan ki dei ban don ïa ka Cash Memo, Trading License khnang ba yn lah ban tehlakam ïa ka jingdie be-aiñ ki dukan.
Ka seng ka la ong ba ki dukan ki dei ban don ïa ka Cash Memo, Trading License khnang ba yn lah ban tehlakam ïaka jingdie be-aiñ bad ki dukan kidei ruh ban buh ïa ki jingthoh ki ban batai shai ïa ki dor trai jong ki marbam mardih.
Ki nongïalam ka KSU ki la dawa ruh ba dei ban buh ïa ka District Consumer Dispute Redressal Commission kat kum ka Consumer Protection Act 2019 bad ruh ban ai ki Consumer Awareness Program ïa ki paidbah kiba leit ban siew ban thied.
Ka KSU kala pyntip ba na ka liang u Deputy Commissioner ula kular ïa ka seng ban pynshitom da kaba tyngeh pyrshah ïa kito ki dukan kiba die palat ïa ka dor kaba la buh bad ula kular ruh ban bthah ïa baroh ki dukan rashon kiba hap hapoh u pud u sam jong ka EJH ba ki dei ban buh ïa ki jingthoh ne Display Board halor ka dor jongki marbam mardih.
