Jowai, Risaw 22: Mynta ka sngi ka Jaiñtia Students’ Union (JSU) Syndai Unit hapoh ka jingïalam u President samla Pynshailang Suliang ha ryngkat ka jingdon lang General Secretary samla Mebanri Suliang bad ki dkhot ka seng ki la leit buh ïa ka jingujor ha ka Additional DC bad ha u CEM ka JHADC halor ka jing tei beaiñ ïa ki jaka Mane Blei jong ki dkhar ha ka shnong Lakroh West Jaiñtia Hills kum ban shu pynkynmaw ba dang ha u bnai March ka Seng ka la leit jngoh ïa katei ka jaka bad ka la complaint ha u Daloi ka Elaka Satpator hynrei haduh mynta ngim shym i kano kano ka dak ka shin.
Ka Seng ka pynpaw ruh ïa ka jingbitar namar ba u CEM ka JHADC um shym treh ban kynduh bad ki dkhot jong ka seng ban ïa kren ban ïa phylliew halor ki mat kiba ktah ïa ka jaidbynriew. Kumta ka Seng ka ai khublei ïa u CEM ka JHADC namar ba ula pyn i im im peit peit ba udei u ingkhong shyllang mat.
Ka seng ka kyrpad ïa ki bor ba dei peit naduh ka District Council ki bor District ba kin shim khia ïa kane ka kam khang ban lait na kino kino ki kynrum kynram lada ka sorkar bad ka District Council kim shim khia ka seng ka la kren da kaba shai ba ngim don ka jingbahkhlieh lada mih kino kino ki kynrum ki kynram hapoh ka thaiñ.
