Shillong, Naitung 02 : Ka Hynñiewtrep Youth Council (HYC) ka la ujor pyrshah halor ka rukom maramot ïa ka surok naduh Mustoh shaduh ka shnong Shella kaba don ha East Khasi Hills District.
Ha ka shithi sha u Assistant Executive Engineer ka tnad PWD, Shella Sub-Division ha kane ka sngi Saitjain, u Vice President jong ka HYC Shella Unit u B Natep u la ong ba ki dkhot ka Council ki la lap ïa kane ha ka jingleit jurip hadien ba ki la ïoh pdiang ïa ka jingujor na ki paidbah bad lap ba katei ka surok kaba dang shu dep maramot dang shen ka la jot lut namar ka jingtorti ka rukom pyntrei.
La ong ruh ba katei ka surok ka la long thliew kylleng bad kane ka la buh jingeh haduh katta katta ïa ki paidbah kiba pyndonkam ïa katei ka surok.
Kumta, na ka liang ka seng ka kyntu ïa ka tnad ba dei peit ba kan phah maramot biang mardor ïa katei ka surok.
“Ka jingrben jong ka jingsiang rong kadei ban long katkum ka work order,” ong u Natep.
