Ujor ka CoRP sha u ADC ban kem mardor ïa ki runar ba donkti pynbthei bom dusmon ïa ki dohkha ha Wah Umsiang
Nongpoh, Naiwieng 08: Ka Confederation of Ri-Bhoi People (CoRP) hadien bym ioh kynduh ïa u DC ka Ri-Bhoi mynta ka sngi kala leit ban ïakynduh syndon ïa u Additional Deputy Commissioner u Raja Brahma naka bynta ban ujor halor ka jingïarap pathar ki dohkha bad long bih ka Wah Umsiang ha Ri-Bhoi naka jingpynbthei bom dusmon ki riew runar ha kaba naka liang ka seng kala dawa ba dei ban kem mardor ïaki runar ba donkti ha katei ka kam ba kum kitei ki jingjia kim dei ban nang jia nangne shakhmat.
Haba kren sha ki pathai khubor naka liang u Bah Bandari Ryntathiang President ka CoRP haka jingdonlang u Bah Pateng Marsing Working President, Bah Doris Suleiñ Adviser ryngkat ki dkhot, u la ong ba kum ka seng ka dap da ka jingsngewkhia ban ioh jingtip ba kila don ki runar ba leit pynbthei bom bad pyniap dusmon ïaki dohkha ha Wah Umsiang hadien bala don ki nongshong shnong kiba la ujor sha ka seng bad kane kala jia haka 27 tarik u bnai Risaw ha kaba la kynnoh ba 2 ngut ki briew ba kynthup ïa u Bah Linus Umbah bad u Phrang Umbah ryngkat bad 2 ngut kiwei pat kila donkti ban pynbthei bom dusmon ha kaba kila don ruh ki briew kiba iohi ïa katei ka kam kaba ki leh.
La kynnoh ruh ba u Bah Linus Umbah bad u Bah Phrang Umbah kila pynbthei bom ha ki ar jaka jong ka Wah Umsiang ba kynthup ha Bora Umlapong bad Thwei Umksih ha kaba bun naki dohkha kila ïap kaba la pynlong bih ruh ïa katei ka wah.
U la ong ruh ba naka liang ka seng ka dawa ba dei ban kem mardor ïaki briew ba donkti ha katei ka kam kumba la ioh jingtip ruh ba naka por shaka por ki riew dusmon ki ju shim kabu ban ber bad pynbthei bom ha katei ka wah kaba lah ruh ban pynduhjait ïaki dohkha, ha kaba naka liang u Raja Brahma kum u ADC u la kular ban shimkhia bad ban pynlong ka jingtohkit ïa katei ka jingpyntbhei bom dusmon ha katei ka wah.
Haka juh ka por naka liang ka seng kala pynrem jur ïa katei ka jingjia bad byrngem tyngeh ruh ba kum kitei ki jingjia kim dei shuh ban dang jia nangne shakhmat bad lada lap lane ioh jingtip naka liang ka seng kan sa leh da kaba tyngeh, u la bynrap.