Na u DC ka West Jaiñtia, dawa ka HITO ba khang ïa ka Non-Tribal Check Point ka JHADC
Jowai, Naiwieng 08: Ka seng Hynñiewtrep Integrated Territorial Organization (HITO) West Jaiñtia Hills mynta ka sngi ka 8 tarik 2023 hapoh ka jingïalam u General Secretary ka sengkmie u bah Wanbun N Dkhar bad u President u samla Wanbiang Pulang ki la leit ban ai daka dorkhas ha u Deputy Commissioner West Jaiñtia Hills District hadein baka seng kala ïoh ïaki dulir ban pynshisha baka Jaiñtia Hills Autonomous District Council lyngba ka RTI ban ka JHADC kam don ïa kata ka Non-Tribal Check Point.
Naka liang ka seng ka dap daka jingsngew lyngngoh ba baroh shi katta kitei ki check point ki shu pynïaid khlem da ïoh jingbit naka JHADC bad naka Licensing Officer katkum ki jubab naka RTI bala ïoh naka PIO Taxation Department bad kane ka jingleh jubab ka JHADC ïaka RTI ka pynlong ïa ki nongïalam jong ka seng ba phah leit khangnoh ïakatei ka khyrdop talasi ïaki bar jyllla kiba wan ban khaïi pateng hapoh u pud u Sam ka JHADC bad halor kane ka seng kala ai por ïa u Deputy Commissioner shitaïew ban khang noh ïakatei ka check point bad lada ym lah ban khang ka seng kan sa ujor syndon sha ïing bishar.
Kum ban shu pynkynmaw ba ïakatei ka RTI la file da u General Secretary ka sengkmie naduh u bnai May 2023 hynrei wat hadein bala kut 30 Sngi ka PIO Taxation Department kam shem la jubab ïaka RTI.
Shuh shub naka liang u General Secretary ula ujor sha ka ophis u Chief Information Commissioner halor ka jingbym lah ban jubab hapoh ka por bala buh katkum ki kyndon ka RTI Act, hynrei hadein bala tuklar ka office U CIC ka JHADC kala ai ïaka jubab dakaba ong ba ka JHADC kam don Non-Tribal Check Point kane ka jingjubab ka PIO ka pyn-i baroh shi katta la shu leh beaiñ bad pyntrei beaiñ ïa ki gate ka JHADC khlem ka jingbit lane khlem da ïoh bor naka Licensing Officer, halor katei ka jubab lyngba ka RTI ka seng kala dawa na u DC ba Khang noh ïakatei ka Khyrdop hapoh shitaïew bad lada ka bor District kim lah ban khang ïa ka seng kan a leit tied shaka jingkhang jong ka ïing bishar la pynkut ka kyrwoh.