Shillong, Risaw 31 : Ki paidbah naduh sor haduh nongkyndong ki la ud la nam namar ka jinglip bording ba khah khah kaba la jan man la ka sngi katba ka bill light pat ka la nang kiew nangkiew na uwei u bnai sha uwei pat u bnai.
Kane ka jinglip bording ba khah khah khamtam ha ka por mynmiet ka la buh ïa ki kmie ki kpa ha ka jingdiaw mynsiem namar une u dei u bnai uba ki khun ki kti jongki ki pynkhreh ïa ka eksamin final ha ki skul bad college ruh.
Kat shaba leit kat shaba wan ki paidbah ki la ud beit sa tang kata ka jinglip bording ha kylleng ki bynta ka jylla. Sha nongkyndong lei lei kiba plie ki ud namar wei ba la lip bording kin hap shong ha ka jingdum da ki sngi ne taiew lynter. Haba leit ujor sha ki bor ba dei peit ruh bunsien ym ju don ba patiaw namar ki kular tang ka ktien katba ka kam pat kim leh. Katba da poi ka bill light pat ki da kyndit thret namar ka kiew da kibun bun shah katba ka bor ding pat ym ju ïoh thikna.
Nalor kata sa kata ka jingpynbna ban pynlip bording noh da ki bun bun kynta ha ka shisngi hana ban ïoh pynbha ïa ki laiñ ding ka la nang pynkhuslai shuh shuh ïa ki khynnah skul bad samla pule. Ha ki por ba mynshwa hooid ka don kata ka jingshna pynbha ïa ki laiñ ding hynrei ym ju pynlip da ki bun bun kynta namar ka ktah jur palat ïa ki paidbah ha kiba bun ki liang khamtam lei lei ha kane ka juk mynta ba ïa pyndonkam computer naduh ïing haduh ki skul, college bad ki ophis lada ym don bording da ki bun bun kynta ka ktah da shisha ïa ki paidbah.
U Myntri ba rim uba peit ïa kane ka tnad mynshwa u la pynbna ba ka MeECL kan pyrshang ban ym pynlip bording shuh ha une u snem namar la pahuh ka bor ding ba la ïoh slap da ki bun bun bnai. Hynrei mynta pat ka MeECL ka pynbna pat ban pynlip bording da kaba aidaw ban pynbha ïaki laiñ ding. Ka jingkylli ka long hato ka dei ka jingpynbha ne ka jingdie ïa ka bor ding ba sa kwah ban pynlip bun kynta ha ka shisngi.
