Ha ka 22 tarik u Jylliew ka snem 1841, kata 181 snem mynshuwa, iwei i lieng kynda i la poi tiap ha ki bynta jong ka Pandua, kawei na ki Shnong Khasi kaba ïeng rasong bha ha ka khaïi pateng ha ki thaiñ Shilot. Na ine i lieng la hiar uwei u Sahep ba bhabriew bad ba don ka maiñ ba i khaiñ bad ka met kaba i shait i khlaiñ bha bad ka jingmut jingpyrkhat kaba skhem, uba hadien u la kylla long u nongpynkylla dur ïa ka jaidbynriew Khasi. Une udei u Sahep Rev. Thomas Jones, uba la wan ryngkat bad i kurim jong u, i Mem Anne Jones.
Na Pandua, u Sahep Jones bad Mem ki la kiew ïa ki thiep jong ka Riwar hapdeng ka jingther u lapbah lapsan bad u la poi tiap ha Sohra hapdeng ka jingjur u lapbah Sohra bad hapdeng ka jingdum lyoh tliw tliw. Kumba ka ong ka kyntieh phareng, the rest is history, u Thomas Jones, u la thaw histori ha ka jaidbynriew Khasi, ha kaba u la thaw ïa ki dak thoh Khasi ABKD….bad u la plie ne pynkhie im biang ïa ki skul LP, kiba la ïap noh bun bun snem hadien ka jingleit phai noh u Alexander B. Lish, u Missionary ba la phah da ka Baptist Mission na Kolkata. Ka khana u Sahep Thomas Jones, kam kut tang ha kam jong u kum u Nongïalap Gospel uba tbit bad uba lah ban pynsngewthuh bad pynkylla ïa ka jingmut jingpyrkhat kiba bun, hynrei ka khana ka bteng kum uta u nongïarap ba khrw ka jaidbynriew Khasi, khamtam ha ka jingïaksaid jong ki na ka jingshah thombor ha ha ki khar Shilot bad ki bor ka East India Company ha Sylhet ha kaba iadei bad ka khaïi ka pateng.
La tip ruh ïa u kum u nongpynmih kot Khasi ba nyngkong eh ha kaba U la pynkylla ktien ia ka kot Rodham bad ka Gospel u Matha?os bad pynmih ia ki ha ki snem 1842 bad 1846. Kumjuh ruh u Thomas Jones u la ai ka kot pule skul kaba nyngkong, ka First Khasi Reader bad kiwei. Ki bym pule bha ïa ka histori ka jingim jong u, ki kynnoh ba udei u Missionary uba la kylla nongkhaïi. Pynban ki jingwad bniah da ki nongthoh kot bad kumjuh ruh ki historian ki ïathuh ba u Thomas Jones namar ka jingieit bad ka jingïadei kaba jan jong u bad ki Khasi bad khamtam eh ka jingtrei jong u ban kyntiew ïa ka ïoh ka kot bad kamai kajih ki Khasi, u la hap ban tuklar ïa ka jingthombor ki khar Shilot bad ki bor sorkar phareng lyngba ka East India Company ïa ki nongkhaïi Khasi sha Sylhet.
Kadei kane ka jingïaleh pyrshah jong u ïa ki bor sorkar phareng kaba la bet ïa u symbai jong ka jingbym shaniah ne ka jingwit na ki bor pynïaid ka Welsh Foreign Mission Board ne ka bor Balang na ri Wales, kaba la pynlong ïa u Thomas Jones ban iehnoh noh ïa ka jingtrei Mission. Hynrei shuwa jong kata, u la wanrah ka jingkylla dur kaba bun ha Ri Khasi khamtam ha Sohra. Na ka jingstah dieng da ka wait sha ka jingot da ka kurat. Na ka jingthang shun da ka dieng sha ka jingthang shun da u dewïong, na ka jingshet kyiad kaba jaboh sha ka rukom shet kyiad kaba kham khuid bad kumta ter ter.
Kumta, ka la dei ka bynta jongngi pat kum ki nongshong shnong jong kane ka jylla kiba pyndonkam ia ki dak thoh Khasi ban kynmaw burom ia une u riewkhraw ym dei eh tang ha kane ka sngi, ka 22tarik u Jylliew hynrei ba kan long ruh ka jingkynmaw burom kaba kham janai bad kaba kham paka da kaba ïa trei lang bad ka sorkar.
