U Tbn. Kor Sutnga na Umkiang u pyndap ïa ka ïing ka sem tang da kaba die shana ha ïew Umkiang

Khliehriat kyllalyngkot 18:Kaba sngewtynnad haduh katta katta ban tip ba u Tymmenbasan (Tbn) u bah Kor Sutnga, u dei u rangbah uba na ka shnong Umkiang, East Jaiñtia Hills District uba lah ban pyndap pynbiang ïa baroh ki jingdonkam ha ïing bad phah skul ruh ïa ki khun da kaba kamai die shana khleh ha ïew Umkiang bad ïa kane ka kam die shana u la sdang naduh u snem 2004, ki paidbah jong ka thaiñ kiba ju thied shana na une u rangbah ki ju khot da u ‘Shana Kor’ bad une u shana kor u dei uba pawnam bha ha Umkiang bad hajan baroh kawei ka thaiñ Narpuh.
U Tbn Kor Sutnga u don san ngut ki khun bad ong ruh ba da kane ka kamai die shana u lah ban phah skul ïa ki khun bad kumjuh ruh ban pyndap pynbiang ïa ki jingdonkam ha ïing ha sem, la lap ruh ba u bah Kor u dei shisha u briew uba trei shitom haduh katta katta bad um ju pynlehnoh ei ïa ka por, ka jingbunkam jong u ha kane ka kam die shana ka dei na ka daw ba ki bun bha kiba wan thied shana na u, khamtam ha ki sngi ïew Umkiang u bah Kor um lah shuh ban trei tang marwei bad ki khun jong u ki ju wan ban ïarap lem ïala u kpa ha kana kane ka kam die shana.
Ka jingbun kiba wan thied shana na utei u rangba ka dei namar ba u nang bha ban khleh bad kumjuh ruh u dei u rangbah uba ki briew ki ieid bha ïa u namar ka jinglong ba shisur shi dur jong u kaba dap da ka khmat ba phuh samrkhie ïa baroh, la lap ruh ba ki nongthied shana ki ju ieng ap da u laiñ ban thied shana ‘Kor na u Tbn Kor ha ïew Umkiang.
Haba kylli shaphang ka ïew die shana jong u ha kito ki por ba don ka khlam covid-19 utei u rangbah u la ïathuh ba u ïoh hi ka lad ban die bad u la leh ha kata ka rukom kumba bthah katkum ki kyndon ka tnat ka koit ka khiah ban ïada na ka jingpang covid-19, u la ïathuh ba man la ka sngi u ju ioh nong beit na kaba die shana bad kane ka kam die shana ka dei ka kam kaba ju kamai mynta la bun bun ki snem.
Ka wei ka longkmie kaba la wan ban thied shana na u Tbn Kor, ka la ïathuh ba naduh ki por ba ka dang rit u bah Kor u la die shana ha ïew Umkiang bad ong ruh ba baroh ki briew jong ka thaiñ ki ieid, ki tip bad ithuh bha ïa une u rangbah.
Kumjuh ruh u samla Ismile Suchen, uba na shnong Umkiang uba ju wan thied shana Kor, u la ong “ Kane ka jingtrei jong u bah Kor ka dei ka nuksa ïa ki wei pat ha kaba ïadei bad ka lad iohkam iohjam, nga kyntu ïa ki samla ki bym donkam don jam ba kin bud ïa kane ka suksa na une u rangbah ban sdang ïa ka kamai kajih ban ieng hala ki kjat, une u shana u long uba ibang, ba i khuid bha, ïa une u shana la tip da kiba bun bha ki briew kiba la Lumshnong, na Sonapur, Ratacherra bad kiwei kiwei ki shnong kiba don ha ka thaiñ Narpuh, namar haba ki poi ha Umkiang ki ju wan ban ïa bam shana kor na une u rangbah”
Haba phai sha kane ka kam die shana jong une u rangbah ha Umkiang, lah ban kynthoh ba ka jingtreishitom ka don la ka dor ban siew bad ka jingtrei shitom ka kyntiew shaphrang ïa ka longbriew man briew bad ka wanrah ïa ka burom bad jingjop.