U Shankaracharya um dei ban ïuhkjat ha Meghalaya, lada u wan ka Sorkar ka hap bah khlieh: Sengbhalang

Nongpoh, Nailur 28: Ki dkhot jong ki sengbhalang bapher bapher ha ka kylla baar jong ka sngi Saitjaiñ ki la mih na la ïing ban leit ap naduh ka por mynstep ha Shillong Airport ha ka shnong Umroi, Ribhoi District tang shu ïoh jingtip ba u nongïalam ka kynhun mane masi un wan poi ha kad liengsuiñ.
Watla ki bor synshar jong ka Ribhoi District ki la pynthikna ba ka liengsuiñ jong u Jagadguru Shankaracharya Swami Shri Avimukteshwaranand Saraswati kam shym la ïoh jingbit ban wan hiar ha Shillong Airport hynrei ki dkhot jong ki sengbhalang bapher bapher ki la ieng beit triang naduh ka por 8 baje mynstep haduh ban da kem ïongreiñ ka bneng khnang ban pynthikna ba u nongïalam ka kynhun mane masi un ym ïoh lad ban rung sha ka jylla Meghalaya.
Khnang ban tem ïa kino kino ki jingjia kiba lah ban mih hapoh u pud u sam jong ka Shillong Airport, ki Pulit ki la syrtap ïa kane ka kad liengsuiñ.
Ki dkhot sengbhalang naduh hynnin ka sngi Thohdieng ki la leit ban ap lypa ha Shillong Airport hadien ba la ïoh jingtip ba u Jagadguru Shankaracharya Swami Shri Avimukteshwaranand Saraswati bad ka kynhun jong u, kin wan da ka liengsuiñ kaba rit sha Shillong ban pynlong ïa ka jingïaid paidbah ne ka Yatra na ka bynta ban kheiñ beaiñ ïa ka jingpynïap bad ban shoh doh ïa ka masi ka ban sa long ha ka 2 tarik Risaw 2024. Namar ba u nongïalam bad ka kynhun kim shym la poi satia, ki dkhot sengbhalang ki la leit phai noh sha la iing bad tang ha ka por janmiet la ïoh jingtip ba un wan poi mynta ka sngi Saitjaiñ. Hapdeng ka jingsyrtap jong ki bor Pulit, ki sengbhalang ki la poi biang naduh ka por mynsstep ban ap ïa u Avimukteshwaranand Saraswati bad ban pyrshah ba um dei ban wan rung sha ka jylla.
U Superintendeng of Police ka Ribhoi u Jagpal Singh Dhanoa bad ki Magistrate ki ïakren ban pynsngewthuh ïa ki nongïalam jong ki sengbhalang ba ki bor synshar jong ka Ribhoi District ki ladep aiti da ka jingthoh sha ki bor pynïaid jong ka Airport Authority of India ban khang ïa ka jingwan iuhkjat jong u Avimukteshwaranand Saraswati bad ban pynthikna ruh ba lada u wan ruh um dei ban ïohmih shabar ka kad liengsuiñ bad kular ruh ba kin ym ailad ïa u briew uba lah ban pynmih ka huri hura ha ka jylla.
Ha ka jingkren bad ki lad pathai khubor ki nongïalam jong ki kynhun sengbhalang bapher bapher ki la pynpaw ba daleilei kin ym ailad ïa u Avimukteshwaranand Saraswati bad ka kynhun jong u ban iuhkjat ha ka jylla namarba ka jingthmu hi ka long ban kheiñ kmie ïa ka masi na ka bynta ban wanrah tang kawei ka ñiam, kawei ka ri hapoh India.
Kum ki briew kiba nabar kim dei ban wan hikai ne ban wan batai stad ïa ka rukom bam bad ka rukom im ha ka jylla namarba ka doh masi ka dei ka doh kaba ki paidbah ki ju bam naduh ki por ba mynshuwa, la ong ki nongïalam sengbhalang.
Ki kynhun sengbhalang bapher bapher ki la byrngem ruh lada u Avimukteshwaranand Saraswati u wan da ka bor hynrei lada jia eiei ka Sorkar Jylla ka hap ban shim hi la ka jingbahkhlieh.
U General Secretary ka Khasi Students Union u samla Donald V. Thabah u la ong ba ka seng ka la phah peit pyrman ïa la ki jong ki dkhot ïoh ba u Avimukteshwaranand Saraswati un wan lyngba ka surok na Ri-Bhoi District.
“Kum ka seng ka la peitngor bad kam lah ban shaniah ïa ka Sorkar, kumba ka Sorkar naduh u Myntri Rangbah u la pyrshang ban thetkti bad ban khynñiat sha ki bor synshar district ban khanglad ïa ka jingpynlong Yatra ha ka jylla,” u la ong.
“Ngim kwah ba une u briew uba la pyrshang lut ban rung sha ki jylla haka thaiñ Shatei Lam Mihngi bad kaba sngewtynnad ka long ba kiwei kiwei ki jylla ka Sorkar ka shimkhia namar ka kamram jong ka Sorkar ka dei ban ïada ïa ki trai ri trai muluk ym ban ngeit ïa kiba nabar ban wan batai stad ïa ka bam ka dih jong ngi,” la ong shuh shuh u General Secretary ka KSU.