U President ka NPP um dei ban kren arsap, ha jylla kwah ILP, ha Delhi kyrshan CAB

Shillong, Naiwieng 21: U MLA jong ka North Shillong, u Bah Adelbert Nongrum, ula ther tyngeh ïa u State President ka NPP, u Dr. WR Kharlukhi, halor ka jingong jong u ba ki paidbah kim dei ban pynlong ïa ka North Shillong ka Constituency kaba shah rkhie beiñ, ha ka por u kren ha ka jingïalang jong ka NPP North Shillong ha ka 19 tarik mynta bnai.
U Bah Adelbert u la ong ba u Dr. Kharlukhi, uba long ruh u MP jong ka Rajya Sabha um dei ban kren arsap, namar ba ka NPP ha ka jylla ka la mynjur lang bad kiwei ki Party ha ïingdorbar ban mynjur pyntreikam ïa ka ILP, katba ha Lok Sabha bad Rajya Sabha pat ka NPP ka kyrshan ïa ka CAA.
Shuh shuh u la ong ba dei ha ka jingïalam ka NPP ïa ka sorkar, ba ki ong ba ym don jingtih dewïong ha ka jylla namar ka jingkhang ka NGT, katba na ka por sha ka por pat la lap ïa ki met ïap na krem dewïong. Nangta ki trok kit dewbilat , hynrei ynda ki kylla ha surok pat lap ba don lang bad u dewïong. “Hato kane kam dei ka jingkren arsap ki nongïalam ka NPP?”, la ong u MLA ka North Shillong.
Da kaba kubur na ka North Shillong ne ka Mawkhar ka dei u dohnud jong ka Ri Khasi, u Bah Adelbert u la ong ba kum u nongmihkhmat u la rah bun tylli ki mat hapoh ïingdorbar bad kawei na kine ki mat ïa kaba ka sorkar ka la hap ban leh kadei halor ka jingpynjlan ïa ka rta thungkam. “Nga la rah ïa ka mat ban pynjlan thungkam bad ka sorkar ka la leh ïa kane”, u la ong.
Nangta u la rah ruh ïa ka mat halor ka jingdonkam ban pynkylla noh ïa ka Reservation Policy jong ka jylla, namar ba la noh shiliang palat, hynrei um shym la ïoh jingkyrshan hapoh ka ïing. Nalorkane u la dawa ruh ban pynbeit ïa u pud u sam jong ka jylla bad ka Assam, ka jingpyn kynriah noh ïa ka jaka sah ki khar metor.
U la pynkynmaw ruh ba um shym la ïashim bynta ha ka jingrakhe dap sanphew snem ka jylla,namar ba um sngew myntoi haba kiba bun ki ishu jong ka jaidbynriew ki shu sah hajuh khlem poi shano shano.
Kum u MLA, u Bah Adelbert u la ïathuh ba u la rah ruh ïa kamat ban pynïakhlad noh ïa ka kam IAS bad IPS jong ka jylla na ka Assam.
U la ong ba kine kin long ki ishu elekshon jong u ha ka snem 2023. U la ong ruh ba u la long kum u nongmihkhmat uban long ka nuksa ïa kiwei pat, namarba wat lada u don lang ha ka sorkarm, hynrei um ju pep pat ban ther ïa ka sorkar ne ban rah ïa ki mat kiba ktah ïa ka ri bad ka jaidbynriew.
“Ki paidbah ki sngewthuh ïano ban rkhie beiñ bad ïano ban nym rkhie”, la ong u MLA ka North Shillong uba la khmih lynti ba un ïakhun ïa ka elekshon MLA na ka Seng VPP ha u 2023.