U John Leslee bad u Bernard pyrshah ïa u Myntri Rangbah na South Tura Constituency

Shillong, Naiwieng 21 : Uwei na ki nongïalam ka BJP bad uba dei ruh u MLA ba rim ka South Tura Constituency u John Leslee K Sangma u la pynbna mynta ka sngi ba un ïa aireng biang na kane ka constituency ha kane ka election MLA 2023. Kumta da kane ka jingrai jongu mynta kiba la thikna ban ïa ai reng pyrshah ïa u myntri rangbah u Conrad K Sangma ki long u Bernard Marak na ka BJP, u John Leslee u bym pat pynbna ïa ka party, ka TMC bad Congress.
Lah ban pynkynmaw ha ka election MLA 2018 ka kyrtong kaba jop na kane ka constituency ka dei ka Agatha Sangma hynrei kane ka la hiar shuki noh ban ailad ïa u Myntri Rangbah u Conrad K Sangma ban ïakhun noh ia ka bye election na kane ka Constituency ban skhem ka shuki myntri rangbah bad ïalade ka la shimti pat da ka shuki MP ba la bat da u Conrad.
Ha kane ka election ka Agatha ka la ïoh 6499 votes, u Bilikid Sangma na ka BJP uba wan ba ar u ïoh 4896, u Grithalson Areng na ka Congress uba wan ba lai u ïoh 3597, u John Leslee uba dei u MLA ha katei ka por u la wan ba saw u ïakhun na ka NCP bad ïoh 3314 votes, u Bernard N Marak uba wan ba hynriew uba ïakhun na ka TMC u ïoh 1560 votes.
“ Nga la shim ïa kane ka rai ban wan phai biang sha ka saiñ pyrthei hadien ba nga la ïoh pdiang ka jingkyrpad na ki seng saiñ pyrthei bapher bapher bad kumjuh ruh na ki paid nongkyrshan jong nga. Nga la rung sha ka BJP naduh ka 29 tarik Jylliew 2022. Nga la shim ïa kane ka rai hadien ba la ïamir jingmut bad ki nongïalam jong nga ha ka jingïalang kaba la long ha ïing jong nga ha ka 20 tarik mynta u bnai ha Palm Dale” ong u John Leslee
“Da ki spah ngut ki paidbah ki la ïapoi ha katei ka sngi ban pyni ba ki thrang ba ngan ïa khun bad kin ai ka jingkyrshan ba pura bad kumta nga la kular hamhmat jongki ba ngan ïa khun beit ha kane ka kynti na South Tura. Kane ka jingïalang ba kyrpang ka long ruh ban pynshai sha ki paidbah halor ki khubor hamsaia kiba la saphriang kylleng shaphang ka jingbym ïakhun shuh jongnga na South Tura hynrei na North Tura hynrei nga la pynthikna ïa ki ba ngan ïa aireng beit pyrshah ïa u myntri rangbah na South Tura” ong biang u John.
U la ïathuh ba u la ïoh ka jingpynbor na kiba bun ban ïa aireng beit. “ Nga la rung sha ka BJP da ka jingthrang ban pynurlong ïa ka jingkwah ki paidbah ïaka roi ka par, ka ïoh kam ïoh jam ki samla bad khamtam ban ïada ïa ki hok ki riti jong ki trai ri trai muluk hapoh ka jylla”. ong u John. “ Nga la ïadon ryngkat bad ïatrei lang bad ki paid ka South Tura bad da ki hajar ki phai khmat sha nga khamtam haba ki ïakynduh ïa ki jingeh bad ki dang don ruh da ki hajar ngut kiba dang shaniah beit ïa nga kumta ngam lah ban shu leh klet ïa ki tang na ka bynta ka jingmyntoi shimet jong nga. Namar kaei kaba nga don ïa ki paid ka South Tura ka dei ka jingieit lada iap ne im ruh ngan ïadon beit bad ki” ong biang u John.
U la ong ruh ba um don kano kano ka jingsngew pyrshah ïaki paid ka South Tura kiba la jied bujli ïa u ha u 2018. U la ong ba ka dei ka jingjied jong ki paidbah ban ailad ïa ka longkmie ka Agatha Sangma khamtam ki kynthei ki sngew ba dei tang ma ka kaba sngewthuh ïa ka jingeh jong ki kynthei khynnah. Hynrei ka la pynduh mynsiem noh ïaki namar ka la hiar shuki tang hadien khyndiat bnai. Ha ka bye election ki paidbah ki la jied ïa u Conrad Sangma ban long u nongmihkhmat jongki bad kane ruh ki paidbah ki leh ïa kaba dei eh namar u la long lypa u Myntri Rangbah ka jylla.
U la ïathuh ba u la sngap jar mynta la san snem namar u burom ïa ka rai ki paidbah. “ Ki paidbah ki tip shai ba ka nongbah Tura ka don da ki jingeh suda bad tang u MLA um lah ban leh ei ei hynrei da ka jingïoh myntri rangbah ki kyrmen ba kiei kiei kin sa kylla bad dei ruh na kane ka jingthrang ki paidbah ba ki la pynjop ïa u Conrad kum u MLA jongki. Hynrei ha kine ki san snem u ïohi ba kam don kano kano ka jingkylla ym don jingroi jingpar lait noh tang ka jingïabamsap suda, ki samla kim ïoh kam ïoh jam kat shaba phai ym i don jingkyrmen namar ki nongmihkhmat ki lap miet sa tang ka jinglute ïa ka pisa u paidbah” ong u John.
“ Ngi la klet ba ngi dei kiei bad kaei kaba kum ki Khristan ngi dei ban leh khamtam ba kane ka jylla ka dei ka jylla ba bun ki Khristan hynrei kane ka sorkar hapoh ka jingïalam u Myntri Rangbah Conrad K Sangma ka thmu ban wanrah sa ka Casino. Nga da sngewnguh ïa ki nongïalam niam ha Shillong kiba la ïeng pyrshah ban ïada ïa ki paid Khristan da kaba lah ban pynkohnguh ïa ka sorkar ban pynsangeh ïa kane ka jingthmu jongka” pynkut u John.