U Myntri Rangbah ka jylla u dei uba pyndonkam nyngkong eh ïa ka kali Ilektrik ha jylla

Shillong, Jymmang 21 : U Myntri Rangbah ka jylla u Conrad K Sangma u dei uba nyngkong eh ban pyndonkam ïa ka kali Ilektrik ha ka jylla kaba kyrteng ka MG ZS EV bad ka jingthmu ba la pyndonkam ïa ka kali ka long ban pyni nuksa sha kiwei ïa ka jingdonkam ban pynduna ïa ka tdem kali khnang ban khuid ban suba ka lyer ha ka mariang.
“ Ngi dei ban pynduna ban pyndonkam da ki kali umphniang bad ban pyndonkam beit da ki kali Ilektrik naduh ki tnad sorkar bapher bapher haduh ki riew paidbah ruh hapoh ka jylla” ong u Myntri Rangbah.
U la ong ba nangne shakhmat ha kane ka nongbah Shillong yn pyrshang ban pyndonkam beit da ki kali ilektrik bad kane hi kan pynduna lut ïa ki jinglut jingsep ha ki tnad sorkar bapher bapher bad ha kajuh ka por kan pynkhuid pynsuba ïaka mariang ruh.
“ Nga shim ïa kane ka kabu lyngba ki lad pathai khubor ban pynshlur ïa ki tnad sorkar bad ïa ki riew paidbah ruh ba kin thied da ki kali ilektrik namar ka dei shijam ban pynïoh pat ïa ki jingjyrngam ha ka jylla bad ka ri bad kan pynduna ruh ïa ka jingpyndonkam ïa ka umphniang petrol bad diesel namar kawei na ki daw bah jong ka jingkylla ka mariang bad ka suinbneng ka dei na ka daw jongka tdem kali” ong u Conrad.
Kane ka kali jong u myntri rangbah ka ngiam ban shong san ngut bad u battery jongka u ïaid haduh 273 mile shisien charge.