U Myntri Rangbah bad ki heh sorkar ki la sngap ïa kiba bun ki jingdawa jongngi ong ka AMMRPWU

Shillong, Nailur 17: Ka All Meghalaya Muster Roll Progressive Workers Union (AMMRPWU) ha ka sngi palei ka la pynbna ba ka la wengnoh ïalade na ka Joint Action Committee (JAC) bad nangne shakhmat ki kam kiba ïadei bad ki Muster Roll kin pyntyllun noh da ka union kaba ki la ïoh ban dep jied ïa ka kynhun treikam kaba thymmai ha ka 4 tarik Nailur, 2026.
Haba kren ha ki lad pathai khubor ha Shillong Press Club ha ka sngi Palei u Bah Nazarious K Lanong President ka seng u la ai khublei ïa u Myntri Rangbah ka jylla u Conrad K Sangma u ba la sngap ïa ki mat jingdawa jong ki kumjuh ruh ïa ki heh sorkar baroh kiba don ha ki tnad sorkar bapher bapher kiba la ïarap ban pyntyllun lem ïa ki jingdonkam jong ki.
Katba u General Secretary u Bah Bympher Lyndem u la ong ba kum ka seng ka ai khublei ïa ka JAC kaba ki la ïa pyntyllun ïa ki kam ha kine ki por kiba la leit ha kaba ki la wad ki lad ki lynti ba kumno ban ïakren bad ka sorkar, ka JAC ka la pynlong da ka jingdon ka All Meghalaya Muster Roll Progressive Workers Union bad ka All Jaiñtia Master Roll Union ki la ïasnohlang bad pynmih ïa ka JAC.
Shuh shuh na ka liang ka seng ka ai khublei ïa u shongknor ka All Jaiñtia Muster Roll Union u Bah Khroo L Pariat bad ïa baroh ki dkhot jong ka JAC bad ka jingkhublei ka long ïa baroh ki shnat treikam jong ka seng kiba don ha kylleng jong ki District.
Dei ka jingtrei shitom ka jong ki kaba kila pdiang ha kaba ki leit ban pynlong ïa ki jingïalang na kawei ka District sha kawei ka district ha kaba ki la lah ban pynurlong bad pynsawa sha ka sorkar ïa ki mat jingdawa kaba ki la ïoh kiba la long ki jingmyntoi na ka bynta jong ki.