Nongstoiñ, Naitung 06: Katba nang mih ki sngi ka imalang sah lang hapoh ka jylla ka la nang shong synjor, ki kam sniew, ka tuh ka thiem, ki kam runar ba laiphew jait ki la nang jyllei bad haba pyrshang ban pynshong nongrim na ki jingjia ha kylleng ki jaka, ngim lah ban len ba ka jingngop jong ki samla ha u drok ka dei ka daw kaba kongsan.
Ha kaba ïadei bad katei ka mat, ym lah ban len ba ha kine ki sngi ki sengbhalang, ki la pyrshang katba kot la ka bor ban khynra bad khanglad ïa ki nongkhaïi haduh ki nongdih drok, da kaba kem bad maham ïa ki ba ki dei ban sangeh noh shisyndon ïa katei ka kam beaiñ. Hynrei katba ki sengbhalang ki nang ïakhun ban khanglad, ki nongdie bad ki nongdih kim patiaw hynrei ki nang ïai leh ïa katei ka kam sniew.
Haba phai ha ki nongkhaïi drok kiba shah kem na ka por sha ka por, la ju ïohi ba kiba bun ki dei ki khynnah samla kiba hapoh arphew snem kata naduh ki nongdih haduh ki nongdie. Lada ngin phai sha ki kyntien ba ki riew rangbah ki ju kren na ka por sha ka por ha ki jingïalang ba la pynlong da ki samla khamtam ha ki lynpung ïalehkai ki ju ong ba ‘ki samla ki dei ka lawei jong ka shnong ka thaw, ka ri bad ka jaitbynriew’. Hynrei lada ïa ki nongkhaïi drok ym lah ban rat diengkhong, kan poi ka por ba katei ka ktien kaba ju ong kan kylla da khongpong bad la hap ban ong ba ki samla ki long ka jingtim ïa ka lawei jong ki shnong ki thaw ka jingim jong ki, ka ri bad ka jaitbynriew.
Halor ka jingkynrei palat u drok, lada ki sengbhalang ne ki briew ka aiñ ki ïoh ban bat ïa ki nongdie, ki la dei ban buddien bniah bha na ki nongdie ba ki ïoh kem, ban lap ksai ïa kiba pynpoi drok shapoh ka jylla. Lada ki nongkhaïi beaiñ ïa utei u jingdih ba sniew kin ym shongthait, ban thaw ki lad ban ïoh pynrung hapoh ka jylla, namar ki don katto katne ki jingthmu kaba nyngkong ka long ban kamai pisa.
Kaba ar pat ban pynngop ïa ki samla khnang ba kin ïoh lad ban knieh ïa ka kamai kajih namar ki samla kiba la shah pyn ngop ha utei u jingdih pynbuaid kim kwah shuh ban trei shitom ban bylla ban sngi ban trei ban ktah, nangta ban knieh ïa ki kam ki jam kiba bun jait.
Nalor kata kaba pynlong ïa ki nongkhaïi drok ba kin tur palat hapoh ka jylla, ka long namar ba ki ïohi ba ki samla jong ka jaitbynriew jong ngi ki jur palat ka jingbud tynneng ïa ka jong kiwei. i kmie ki kpa ruh ki pyllait laitlan bad ai mon bad ngeit biej palat katba ong ki khun, khlem da bishar kaei kaba ki dei ban ngeit bad kaei kaba kim dei ban ngeit.
Kumta ki kmie ki kpa ki la dei ban pyrkhat khia, namar lada ka long kumba ka long ha kine ki sngi ka imlang shalang, ka burom ka akor jong ka jaitbynriew ka la kylla long tang kum ka syrdep jot.
