Katno ka long kaba sngew synei ban pyrkhat shaphang kito kiba ïa ngat ha ka apot jong ka jingkyrni ha ka jingdih drok, ym tang ba ka ktah ïa ki shimet hynrei ka ïing ka sem baroh kawei ka don ha ka jingim kaba dum. Ki drok kiba dei ki jingdih ba pynbuaid ki long ki atiar jingdum ba shyrkhei tam bad ki dei ki mar ba remdor bad lah ban ong dei tang kiba riew spah kiba lah ban lalehkai bad ki. Ka long kaba shyrkhei ban ngop ha kine ki jingriam kiba ym ju lah koit ban ïohi ïa ka jingsdang jong ki, hynrei dei tang haba kito kiba ïa kyrni kila poi ha u pud ba kim lah shuh ban rieh ba la lah ban ïohi paidbah ïa ki. Ki drok ki dei ki jingdih ne ki dawai kiba trei jai jai bad namar ba ki dei kiba remdor ki samla kiba duk kin ym lah satia ban pyndonkam ïa ki lait noh ba ki shu ïoh ei na ki paralok kiba kloi ban pynlut pisa lem na ka bynta jongki. Ka long kaba sngew suhjer ban tip bad ïohi ba kine ki atiar jingdum ki la ïoh wat ban rung sha ki dong jong ka nongbah Shillong kum sha Mawïai kaba dei ka shnong ba shong ba sah tang para Khasi.
Ki don shibun ki daw ba ïalam ïa ki samla sha ka jingkyrni dih drok, kawei na daw kaba hakhmat eh ka dei ka jing synjor jong ka longïing longsem. Ka jingbym don ka rukom pyrkhat ha ki kmie ki kpa ban pyrkhing ïa la ki khun ha kaba pyn donkam ïa ka pisa. Ka jingai pisa puk puk ïa ki khun bad pynbiang katba ki ang ka pynjot ym tang ïa ki khun jong ki shimet, hynrei ïa ki khun jong kiwei ruh bad ruh ka wanrah ka jingjah burom bad ka jingjynjar ïa ka ïing hi baroh kawei. Ym lah ban len ïa ka jingriewspah jong ka imlang sahlang mynta ha kine ki sngi bad dei na ka jingbun palat ka jing kamai ne ka jingïoh pisa ba ki briew ha kine ki sngi kim don por shuh hynrei baroh ki bunkam beit ban kamai. Dei na kane ka daw ba baroh baroh ki ong ba ka por ka la lyngkot bad imat kam don shuh 24 kynta ha ka shi sngi. Toi ki kynta bad ki second kim shym pat kylla ki long beit kumjuh.
Uwei u Rangbah u la ong ba ka daw kaba kongsan bad kaba hakhmat eh jong ka jingïoh lad jong ki samla ka dei na ka daw ka jingkynrei palat ka kamai shukor ba ki kmie ki kpa ki ai beit puk puk ïa ki khun katba ki ang. Ka jingïohlut jong ki khun ïa baroh ki jingkwah ha ka por ba ki dang rit dang lung ka rta ka pynlong ïa ki ban hiar dor noh ha ka longbriew man briew bad kiew dor ki kam sngewbha. Ka jingsngewbha ne ka enjoyment kam lah satia ban pynhun ïa ki briew ha kano kano ka kyrdan, dei na kata ka daw ba ki ïit ïa kiwei pat ki jingsngewbha kiba kham khlain bor bad u drok u dei u wei na ki atiar ba khlain bor tam bad shisien ba la ngat la long kumba thep ha along dalade ïalade. Ha kaba kut lada kim ïoh ïa u drok ki samla kim salia ban leh ïa kano kano ka kam ruh bad kin ïaleh kat lah katïai ban pynngop lem ïa kiwei khnang ba kin long ki nongkyrshan jong ki.Ki nongdih drok kim lah ban shu long nongthied sah, hynrei kin ïit ïa ki lad ki lynti kumno ban ïoh ban die de ïa ki khnang ba kin lah ban kyrshan ïa ka jinglut ba shyrkhei.
Dei na katei ka daw ba la lah ban ïohi ba ki pulit ryngkat ka jingiatreïlang jong ki Dorbar Shnong ki la ïoh ban kem ïa ki samla kiba pyrshang ban pynïaid ïew ïa ki drok hapoh ka shnong. Baroh shi katto la ju bna ba kum kine ki kam ki jia ha ki shnong kiba ïa shong khleh bad kiwei pat ki jaidbynriew, hynrei mynta kane ka kam ka la rung wat ha ki shnong ba ïashong tang para khasi ruh. Ka long kaba shyr khei ba kumno kitei ki samla ba die drok ki ïa pyrshang ban pynngngop ïa ki khynnah skul kiba dang lung dang rit ka rta.
Ka long kaba donkam ïa ki longïing longsem ban long kiba husiar bad kum ki kmie ki kpa donkam ban peitngor bha ïa la ki khun ki kti. Uwei u rangbah u la ong ba ki kpa khamtam lei, kiba dei ki nongkamai ka ïing kim dei ban pyni kop ne khyllew hakhmat ki khun ba haduh katno ki kamai namar ba kane ruh ka ïalam bakla ïa ki khun ki kti bad ka jingsngew riew spah jong ki ka wanrah ïa ka jingsngew sarong. Katno ka long kaba sngewlyngngoh ba ki don ki longïing kiba ki kmie ki kpa ki la hap ban bsa ïa ki jingdonkam drok jong ki khun jong ki tang na ka daw ba kim lah ban peit ïa ki jingktah jong ka jingkyrni dih drok jong ki. Haduh kumba 2000/- tam shi sngi ki don ki kmie ki kpa kiba shlan ban iarap kyrshan pisa ban pynïoh ïa ki drok na ka bynta ki khun jong ki. Hynrei ha kaba kut kim shan bad ki hap ban leit ïalam noh ïa ki khun sha ki jaka aijingsumar.
Ki Dorbar Shnong ki donkam ban peitngor shisha bad shim khia halor kane ka phang kaba lah ban ktah jur ïa ka imlang shlang. Ki bor pulit barabor ki long kiba iatreïlang bad ki paidbah ha kiba bun ki khep ba kum kitei. Ka sorkar ka donkam ban shimkhla ban wanrah ïa ki lad jingpynsngewthuh paidbah kiba kham khlain halor katei ka phang khnang ba ki longïing kin long kiba phikir bad kiba peitngor.
