U dewïong um neh sah, pynleit jingmut noh sha ka jngohkai pyrthei, ong u Bah Paul

Khliehriat, Risaw, 20: U Myntri ka tnat Jngohkai Pyrthei, u Bah Paul Lyngdoh ha ka sngi Thohdieng u la plie paidbah ïa ka jingkieng ha Sahksaw kaba dei ka jaka jngohkai pyrthei kaba la paw bha ha ka shnong Chamcham, East Jaiñtia Hills District.
“Nga kyntu ïa ki paidbah jong ka East Jaiñtia Hills ba kin phai khmat bad kin pynleit jingmut bha noh sha ka kam jngohkai pyrthei bad namarba u dewïong um neh sah bad ka don ruh ka NGT, ka don ka iingbishar Supreme Court bad ki don ruh ki aiñ ki kyndon kiba khanglad haba trei ïa ka kam tih dewïong, hynrei ka kam jngohkai pyrthei pat mano ban khang, u Blei u la ai katne ïa ngi kumta ai ba ngi ruh ngin ai eiei kum ka jingsngew nguh ïa ka jingai ba kordor jong u Blei,” ong u Bah Paul haba kren kum u Kongsan.
Haba ai nuksa ïa ka shnong Sohra u Bah Paul u la ong, “mynshwa ka shnong Sohra ruh ka dei kaba im ja na ka kam dewïong, hynrei ïa kane ka kam la pynsangeh noh ban trei namarba ka la pynjot ïa ka mariang, ka pynjot ïa ki um ki wah, kawei ruh ka long ba u dewïong u dei u ba lah ban lut noh shi sien ka sngi, hynrei ka kam jngohkai pyrthei pat ka dei kaba lah ban pynneh bad pynbha pateng la pateng bad nang pynbha shuh shuh.”
“Ngi long kiba riewspah ha ka jingdon ka spah mariang ba u Blei u l aai hynrei kumno ngin ud ba ngi duk, ngi im ha ka ri ba riew spah tangba ki briew pat ki duk, hato ka long hi? Ngim duna ei ei shuh, hynrei kaei kaba dang duna ka long ba ngi duna ban pynleit jingmut ha ki kam, namarba la teh mraw ïa ngi da ka jingsngew ba ngi dei ban ioh tang ïa ki kam sorkar,” ula ong.
U la pynshlur ïa ki nongshnong shnong jong ka East Jaiñtia Hills ba kin shim ïa ki skhim ban shna îa ki iïng basa lane ki Home Stay na ka bynta kiba wan jngohkai pyrthei.
U la pynbna ruh ïa ka skhim kaba T. 1.00 klur kaba la mang ban kyntiew ïa ka kam jngohkai pyrthei ha East Jaiñtia Hills District bad ong ruh ba baroh ki dorkhas ba u la ioh pdiang kin kynthup lang hapoh kane ka skhim ba shi klur tyngka.
U Myntri u la pynsngew ruh ba ka Sorkar ka dang pynkhreh ruh ïa ka Detailed Project Report (DPR) na ka bynta ki Tourist Circuit ha kaba shen yn sa pyntreikam noh ban shna ïa ki kynroh, ki jaka ieng kali bad kiwei kiwei kyntiew ïa ka kam jngohkai pyrthei bad ki don ruh kiwei kiwei ki kam kiba la dep ban pyntrei bad kiba dang pyntrei mynta ha shnong Rangad, ha ka kshaid Umbyrleiñ bad kumjuh ruh ha kiwei kiwei ki shnong.
U MLA ka Khliehriat Constituency Bah Kyrmen Shylla uba long u Myntri Sorkar haba kren kum u Symbud Kongsan u la kyrpad ïa u Myntri ka tnat Jngohkai Pyrthei ban peit ba ki dang don bun ki kam kiba dang sahteng kiba ïadei bad ki jingthmu ban kyntiew ïa ki kam jngohkai pyrthei ha ka thaiñ San Shnong, kum ka surok kaba pyniasoh ïa ka shnong Lumshyrmit bad ka Shkentalang.
U la kyrpad ia u Bah Paul ba un iarap ban pynioh ïa kane ka surok, kumjuh ruh u la ong ba ïa kane ka surok ha kine ki san shnong ruh la donkam ban pynheh noh namar kiba wan jngohkai pyrthei ki ju wan ruh da ki bus kiba dei ki kali heh bad kane ka surok kumba long mynta ka dang rit na ka bynta ki kali heh. U la kyrpad ruh ban iarap ban pynrung lem ïa ki shnong kiba na East Jaiñtia Hills District hapoh ka thup jong ka Tourism Circuit khnang ban dup kyntiew shuh shuh ïa ka kam jngohkai pyrthei hapoh ka district.
U la pan ka jingiatreilang na ki bor shnong bad na ki paidbah bad u la kyrpad ba kin long kiba iai shah namar kano kano ka kam kam dei kaba lah ban pynurlong noh kloi kloi tang hapoh kyndiat sngi hynrei donkam ban iaishah bad ban ap.
“Balei ngi kwah ban phaikhmat noh sha ka kam jngohkai pyrthei, ka dei namar ba ngi tip ba u dewiong u la jan lut bad ha ka juh ka por u long be-aiñ hakhmat ka aiñ lada ngi tih be-aiñ kumta ngi kwah ban kyntiew noh da kane ka kam jngohkai pyrthei. Ki jaka ha kane ka thaiñ San Shnong ki dei kiba don dewïong hynrei watla katta ruh ki nongshnong shnong ki iaishah da ka jingngeit ba ka tnat Tourism bad ka Sorkar kin ai ka jingiarap bad jingkyrshan lem ban kyntiew ïa kane ka kam jngohkai pyrthei,” u la ong.
U la ai ruh ka jingiaroh bad ïa ki bor pynïaid shnong bad iathuh ruh ba ha ki snem kiba la leit ki bor shnong ki la pynwandur ïa ki shnong ki thaw bad ki jaka kiba itynnad da kaba pyntrei lyngba ki skim 100 sngi. U la ai khublei ruh ïa ka Jaiñtia Eastern College, Khliehriat kaba la iarap lem ha kaba kyntiew ïa kane ka kam jngohkai pyrthei.
U Director jong ka tnat Tourism Meghalaya, u Bah Cyril V.D Diengdoh, u la pynshlur ïa ki paidbah ba kin shimkhia ban kyntiew ïa kane ka kam jngohkai pyrthei namar kane ka ai jingim da kaba lah ban thaw ïa ki lad kamai pisa namar haba ki briew ki wan ban jngohkai ïa kino kino ki jaka ki wanrah ïa ka pisa, ki nongshong shnong kim donkam ban leit shane shatai namar ka pisa ka wan hi ha shnong.
U la pynshlur ruh ïa ki nongshnong shnong ba kin shim ïa kane ka kabu ban shna ïa ki iïng shong basa lane ki Home Stay na ka bynta kiba wan jngohkai pyrthei, namar kiba wankai kin ym wad ïa ki 5-Star Hotel hynrei ki ju sngewtynnad ban sah ha ki iïng basa lane kai Home Stay.
Ha kane ka sngi, la ai jingkren ruh na u Deputy Commissioner jong ka East Jaiñtia Hills District u Abhilash Baranwal, Principal jong ka Jaiñtia Eastern College Khliehriat u Dr P.Nongtdu, u Waheh Shnong jong ka shnong Chamcham u Ma Karlud Dkhar, u MDC u Ma Lasky Rymbai bad kiwei kiwei.
La pynbyrngia ïa ki paidbah da ki jingshad tynrai na ki samla pule jong ka Jaiñtia Eastern College, na ka Ïaseiñlang Village Organisation.