U CM ba mynta haduh u CM barim ki kwah ban jop elekshon shiteng samoi ha Gambegre : President MPCC

Shillong, Naitung 06 : Ka elekshon shiteng samoi samoi kan dei ka elekshon kaba shongshit tam napdeng baroh ki elekshon kiba long ha ka jylla naba naduh u Myntri Rangbah ba mynta haduh u Myntri Rangbah barim ki kwah ba ki kyrtong jong ba ki dei ban jop : ong u President ka Congress Bah Vincent H Pala haba kren bad ki lad pathai khubor.
Ïa kane, u President ka Congress u la kren hadien ka jingïalang pynkup burom ïa u MP ba thymmai ka Congress na Tura, u Saleng A Sangma ha ka jingïalang kaba long ha Soso Tham Auditorium, Shillong.
Haba kren bad ki lad pathai khubor, u Bah Vincent u la ong, “Mynta ngi la khot aplikeshon na kito ki kyrtong kiba kwah ban aireng ha kane ka elekshon shiteng samoi kaban sa long ha ki khyndiat bnai ban wan,” u la ong.
U President ka party u la ong ruh ba kane ka elekshon shiteng samoi kadei kaba shongshit naba baroh ki party ki phaikhmat lut sha katei ka constituency kaba la shong thylli hadien ba u MLA jong ka, u Saleng A Sangma u la shah jied noh kum u MP ba thymmai ka Tura.
Nalorkata, u ong ruh ba katkum ka jingtip ba ki ïoh, u Myntri Rangbah ka Jylla, Conrad K Sangma u la thmu ban pynieng da ka kurim na ka party NPP, nangta na ka TMC pat u Myntri Rangbah ba rim Dr. Mukul Sangma u thmu ban pynieng da ka para kynsi kaba dei ka kurim jong u Zenith Sangma Myntri barim ka jylla.
“Baroh baroh ki phaikhmat lut shane mynta la ka long naduh ki Myntri Rangbah barim, Myntri Rangbah ba mynta bad Myntri Rangbah ban sa shimti,” bynrap biang u President.
Ha katei ka jingïalang pynkup burom kaba shongkun la wan ban donlang da ki MLA ka party kynthup naduh u Nongïalam ka Liang Pyrshah Bah Ronnie V Lyngdoh, nangta u MLA ka Mawhati, Bah Charles Marngar, MLA ka Nongstoiñ Bah Gabriel Wahlang bad ruh u Working President ka party ba dei ruh u Deputy CEM ha KHADC, Bah PN Syiem.
Nalor kine, ki paidbah nongkyrshan ka Congress na kylleng ki bynta jong ka jylla ki la wan ban shim bynta.
Lah ban kdew hangne, u Saleng A Sangma uba aireng na ka seng Congress ha kane ka elekshon MP u la ïoh ban pynliem kput ïa ka kyrtong jong ka NPP kaba dei ruh ka MP ba la jop bunsien, ka Agatha Sangma.