U CEM KHADC u dei u kpa ka Jaidbynriew, hato u hun mo ban pynduhkam ïa la ki khun : PT Sawkmie

Shillong, Jylliew 15 : U Bah P.T Sawkmie, MLA barim mynta ka sngi u ong ba u Chief Excutive Member (CEM) ka Khasi Hills Autonmomous District Council (KHADC u dei u ba khmih ïa ka council bad u long kum u kpa u ba peit ïa ka Jaidbynriew baroh kawei, kumta u la buh jingkylli, hato kum u kpa u ba don ka jingkitkhlieh u hun mo ban pynduhkam ïa la ki jong ki khun ki kti?.
U bah Sawkmie u la pynpaw ba ka kynrum kynram hapoh KHADC ka la mih hadien ba kane ka EC ba la ïalam da ka Voice of People Party (VPP) ka la weng kam ïa ki katto katne ngut ki staff kiba la regularise, ki staff kiba dang shu dep thung ha la ka jong ka jong ka post. Kumjuh la ai jingmut ban trei biang kum ki casual staff. Kumba ka High Court ba donburom ka la ai ïa ka stay order na ka bynta ki katto katne ngut ki staff, ba ki lah ban join ne trei biang ïa ka kam kaba ki trei mynshwa.
“Kumjuh na ka liang jong nga nga kyntu ïa u CEM ban weng noh shisyndon ïa ka order ba la weng kam ïa kito staff ne nongtrei bad ban shah ïa ki ban join biang ha la ki jong ka post bad ki department kiba ki don,” ong u bah Sawkmie.
U la bynrap, “Ngim lah ban len ba kane ka executive committee ka don la ka jong ka policy, hynrei ka policy ban weng kam ïa kiba la trei ngim ïa hap satia.”
“Nga don ka jingkyrmen ba ka EC kan shong pyrkhat biang sa shisien, khnang ba kito ki nongtrei kiba la shah beh kam kin ïoh mynsiem biang bad ba ki khun ki kti, ki lok kiba ha ïing ha sem kin ïa kmen lang,” pynkut u bah Sawkmie.