Shillong, Jylliew 15: Ki nongïalam ïa ki nongjngohkai pyrthei ha ki thaiñ Sohra ki la ong ba kan kham shngain shibun ïa ki nongwan kai lada ki khot da ki ‘guide’ ban batai lynti bad ïalam sha ki jaka jngohkai pyrthei khamtam lada ka jaka ka kham pajih.
Haba kren bad ki lad pathai khubor hadien ka jingïaid rally dang shen ha Sohra, kine ki samla ki la ong, “Khamtam ha kum kane ka por slap kan bha shibun ïa ki nongwan jngohkai ban khot da ki nongïalam lynti lane ki guide namar kan ïarap ïa ki ban poi sha ka jaka kaba ki kwah ban leit bad ruh ban lait na kaba bakla lynti,” ong uwei na ki samla ba ju ïalam ïa ki nongjngohkai.
Uwei pat u samla u la ong ba ka jinglong jong ka jaka ha ki thain Sohra watla ka long kaba itynnad hynrei ha ka por slap bun ki jaka ki btuid kumta donkam ïa ki briew kiba tip bha ïa ka lynti ïaid khnang ban lait na kino kino ki jingjïa bym sngewtynnad.
Nalorkata, u ong ruh ba ka thain Sohra ka don shibun bha ki jaka jngohkai kiba itynnad bad ruh ki um ki wah, ki kshaid bad kumjuh kiwei ki jaka kum ki jingkieng jri. Kumta ban poi sha kitei ki jaka kiba kham jngai bad kiba donkam ban ïaid kjat kan shngain ïa ki ban don da ki nongïalam lynti.
“Haba donlang ki guide, phin ym bakla lynti lada phi kwah ban leit kai sha ki khlaw ne ki jaka ba kham pajih ruh,” ong sa uwei pat u samla.
Uwei pat u la knieh ktien da kaba ong, “Ha ka thain jongngi ki bun palat ki jaka jngohkai pyrthei bad katba nang ïaid ka por katta nang mih shuh shuh kham bun ki jaka. Kumta kan bha ïa ki nongwan kai kin shim beit da ki nongïalam lynti namarba da kaba leh kumta kin lah ruh ban poi leit peit kham bun tylli ki jaka namar la don ki nongïalam.”
U ong ruh ba da ka jingdon ki guide kiba dei ki trai shnong ka pyntikna ruh ïa ka jingshngain ïa ka leit ka wan jong ki nongwan kai namar ïa ki la ithuh naduh ka Dorbar Shnong bad kumjuh ruh da ki bor pulit.
