Nongpoh,K’lyngkot 12: Ka Meghalaya Pradesh Congress Committee (MPCC) ha ka sngi Saitjaiñ ka la pynbna paidbah ïa ka kyrteng u Bah Lawrence Nongrum kum kyrtong ka Congress ban aireng ha ka election MDC sha KHADC na Nongpoh Constituency.
Ka Ri Bhoi District ka don san tylli ki Constituency. Kiwei pat ki kyrtong ka Congress na Ri Bhoi District, ki kynthup ïa u Bah Dominic Mynsong na Mawhati Constituency, u Bah Rocky Marwein na Umsning Constituency, u Bah M.D Syiem na Umroi bad u Bah Victor na Jirang.
Haba ïa kren bad ki nongthoh khubor, u Bah Lawrence Nongrum, u la ai khublei kyrpang ïa ki nongïalam ka MPPC, ki nongïalam ka Ri Bhoi District Congress Committee (RBCC) bad ki nongïalam ka Nongpoh Block Block Congress Committee (NBBCC) kiba la ibit ïa u ban long kum u kyrtong ka Congress ha ka election MDC na Nongpoh Constituency.
U la pynpaw ba ka daw kaba la pynlong ïa u ban mih shakhmat ban pan ticket na ka Congress, ka dei halor shibun ki nongrim kiba u kwah ba shakri ïa ki paidbah ka Nongpoh Constituency bad ha ka jylla hi baroh kawei.
U la bynrap ruh da kaba ong, ba un lah ban leh ïa shibun ki jingangnud kum uta u shakri ha ïingdorbar thawaiñ jong ka KHADC ha kaba u donkam rh ïa ka jingkyrshan na ki paidbah jong ka Nongpoh Constituency.
“Da ka mynsiem jong ka jingsngewrit nga kyrpad ïa ki paidbah jong ka Nongpoh Constituency ba kin ai jingkyrshan radbah ba ngan poi sha ka thong jong ka jingjop khnang ba ngan dup lah ban pynurlong ïa kita ki jingangnud ban shakri ïa ki paidbah,” la ong u Bah Lawrence Nongrum.
