Shillong, Jymmang 25: Ka jingïakhun jong ki khynnah shynrang jong ka Meghalaya ha ka Swami Vivekananda U-20 Men’s National Football Championship 2025 ka la kut kynsan hynnin ka sngi U Blei (25 tarik Jymmang, 2025) hadien ba ki la shah rem kput da 4-0 kol ha ka Mizoram ha ka semifinal kaba ar ha Narainpur, Chhattisgarh.
Shuwa kane ka jingïalehkai, baroh arliang mamla ki la jop lut ïa ki jingïakhun ba la dep hynrei ka la long ar taïew tam naduh ba la ïohi khatduh ïa ka Meghalaya ba kan ïalehkai. Namar ba ka league ka long kaba kyllaiñ, ha kaba tang ar tylli ki Group la pynïalehkai ha kajuh ka por, hadien ba ka Meghalaya ka la jop ïa ka quarterfinal ka la hap ban ap haduh da kut baroh ki jingïalehkai jong ar tylli ki Group ba dang sah bad ruh ïa ka quarterfinal.
Katba ka Meghalaya ka la ïalehkai khatduh ha ka 9 tarik Jymmang, ka Mizoram ka la jop ïa ka QuarterFinal jong ka pyrshah ïa ka Punjab dang ha ka sngi Thohdieng bad kumta ka don shibun ka jingkyrmen ban wan sha ka jingïakhun hynne ka sngi, hynrei ka long kumjuh ïa ka Meghalaya, namar ka kynhun ka la ïoh shibun ka por ban shongthait bad pynkhreh ïa ka semi final.
U Coach jong ka Meghalaya u Bah Bobby L Nongbet u la pynïalehkai ïa ka kynhun ba pura hynrei ka la shah pynjem khnap ha ka Mizoram, kaba la pynkhih ïa kitei ki saw kol lyngba u Mesak C Lalrinngheta (28’, 76’min), u Dantes K Lalhriatpuia (83’min) bad u F Vanlalchhanchhuaha (90’+2’min).
Watla ka la khyllem noh ha ka semi final, hynrei mynta u snem la sakhi ïa ka jingkiew kaba khraw haba ïanujor bad ka jingïalehkai jong u snem 2024 ha kaba ka Meghalaya kam shym la lah ban jam shakhmat palat ïa ka Group Stage. Ha ka jingïakhun mynta u snem 2025, ka la jop ïa ka Rajasthan da 4-0, ïa ka Kerala da 2-1 kol bad ïa ka Bihar da 7-0 kol ha ka group stage shuwa ban pynliem ïa ka Karnataka da 1-0 kol ha ka quarter final.
Ha kawei pat ka liang ka Mizoram kan aireng pyrshah ïa ka Delhi ha ka final. Ka Delhi ka la pynliem noh ïa ka Sports Authority of India da 4-0 ha ka semifinal kaba nyngkong.
