Shillong, Risaw 29: Ka kynhun ki thei ïalehkai kriket U-19 jong ka Meghalaya ki la lah ban pynliem noh ïa ka Arunachal Pradesh ha kawei na ki jingïakhun jong ka lympung U-19 Women’s T20 Trophy 2025-26 plate group, kaba la long ha Lucknow hynne ka sngi.
Da ka jingïalehkai bha jong ka Cheanchi Kambesa Sangma ka kynhun ki thei ïalehkai ka jylla, ki la ïoh syndon ban khur ïa ka jingjop da 31 ron ïa ka Arunachal.
Ha kane ka jingïakhun, na ka liang jong ka Cheanchi ka la lah ba kan kamai 30 ron bad ban ïai neh haduh ba kut jong ka pali tied, bad hadien kane ka la ïarap ba kan khur pat 3 wiket naka bynta 12 ron haba wanphai ha ka boling, kaba la biang pura ïa ka kynhun Meghalaya ba kan khur ïa ka jingjop kaba nyngkong ka jong ka ha kane ka lympung, hadien ba ka la mad shuwa ïa ar tylli ki nam rem na ki jingiakhun ba shakhmat ha ka Sikkim bad ka Manipur.
Ka Arunachal ka la jop ïa ka jingkynting pisa (toss) bad ka la ailad ïa ka Meghalaya ba kan wan ba kan tied nyngkong, kaba hangne ka Monica Singh ka la lamkhmat ïa ka kynhun da kaba kamai 27 ron na ki 24 tylli ki bol, bad da kaba bynrap lang da ka Jayshee Singh 14 ron na ki 32 tylli ki bol bad ka ka Cheanchi 30 ron na ki 39 tylli ki bol, ka kynhun ka la ïoh ban seng ïa ka nongrim kaba 91 ron naka bynta 6 wiket naki 20 ober.
Wat lada ka thong ka lah ban long kaba rit, pynban ka la plie lad ïa ki thei kawang bol jong ka Meghalaya ban mih madan da ka mynsiem ïakhun kaba shlur ha kaba ki la lah ban pynhap ïa ki 9 tylli ki wiket ka Arunachal tang na ka bynta 60 ron na ki 20 over, ha kaba ka Kino Nanung marwei ka la lah ba kan kamai 20 ron.
Nalor ki 3 wiket ba la khur da ka Cheanchi, ka Jayshree ruh ka la lah ban khur 3 wiket naka bynta 9 ron na ki 4 over, katba ka Fennysha Nongrum bad ka Banchila R Marak kiba la ïoh ban khur lem mar shi wiket ban pynthikna ïa kane ka jingjop na ka bynta ka Meghalaya.
Ka jingiakhun kaban wan ïa ka Meghalaya ha kane ka lympung kan long pyrshah ïa ka Nagaland ha ka sngi Thohdieng.
