Shillong, Naiwieng 16: Ka kynhun ïalehkai jong ka Shillong Lajong FC ka la ïoh rung sha ka final ha ka lympung phutbol kaba la tip da ka Oil-DFA All India Level Under-19 Inter-Academy Invitational Football Tournament 2023 hadien ba ka la khur ïa ka namjop ha ka semi final pyrshah ïa ka Classic FA ka kynhun kaba na Imphal.
Ha kane ka jingïakhun ki khynnah lehkai ka Lajong ki la jop salit da shi kol ïa ka Classic FA bad ïa kane ka kol la thep da u Rimankhraw Kharumnuid.
Ha kaba kut jong ka jingïakhun, u Badondor Marbaniang u la ïohpdiang ïa ka khusnam kum u rangïalehkai ba kynsai ha kane ka jingïakhun lane Man of the match lyngba ka jinglah ban lehkaibha ka jong u bad u ba la lah ban pynïoh shibun ki kabu na bynta ka kynhun.
Lyngba kane ka namjop, ka kynhun Under-19 jong ka Lajong kan sa hap ban aireng pyrshah ïa ka kynhun ba jop ha ka semi final ba ar, kata ka SAI, Manipur lane pyrshah ïa ka Siniolchu FC kaba na Sikkim.
ïa ka final a pynbeit ban pynlong ha ka 20 tarik Naiwieng, 2023, kaba hap ha ka Lah Sngi U Blei bad ka jingïakhun kan long ha ka por 7 baje janmiet ha Duliajan, Assam.
