Shillong, Kyllalyngkot 24: Ka resol jong ki jingïalehkai ka lympyng Under-16 Boys Football League 2023-24 hynne ka sngi (24 tarik Kyllalyngkot) ba la pynlong ha madan SSA Stadium, Polo.
La sdang ïa ka jingïalehkai kaba nyngkong kumba ju long barabor, kata ha ka por 9:30 baje mynstep, ha kaba ka kynhun Mawreng SC ka la khur jingjop hadien ba pynliem ïa ka Mawpat SC da 2-1 kol.
Ka Mawreng SC ka la ïoh pynkhihjar nyngkong na u Mewanteiskhem Marbaniang ha ka minit ba 12, nangta bud sa ka kol ba ar na u Banshemphang Jana ha ka 43 minit. Na ka liang jong ka Mawpat SC ka la ïakhun tyngeh ban pynphai hynrei ïohlad ban thep tang shi kol kaba la wan na u Calvinnidi Pyngrope ha ka 59 minit.
Ka jingïakhun kaba ar ka kynhun ïalehkai jong ka Merinda FC ka la pynjemkhnap ïa ka Lumshyiap SC da kaba pynbam haduh 5 kol.
Kine ki san kol ba la pynthikna namjop ïa ka Merinda FC la thep da u Bestius Nongbsap tang mar ïasdang 2 minit ka por, nangta na u Mebankhraw Nongrum (18 min), u Mebankitlang Mawlong (26 min), u Lumlang M Mawlong (34 min) bad khadduh na u Iaiteibor Kurbah (48 min).
Ha ka jingïakhun kaba lai, ka Shillong Soccer Scout ka la shah pynliem da 3 kol ha ka Umphyrnai SC. Haba phai sha ka jingïakhun, u Iaiapkyrmen Kharkongor u la ïoh ban buh ïa ka Umphyrnai SC hakhmat lyngba ka kol kaba u la thep ha ka minit ba 7. Bad ki ar kol na u Ricky Kharkongor (39 min) bad u Mewankyrshan Nongrum (57 min) ka la pynthikna ïa ka kynhun ban khur ïa ka jingjop.
Haba phai pat sha ka jingïakhun kaba khadduh hynne ka sngi, ka kynhun jong ka Mawlai SC ka la lah ban jop salit da 2-1 kol ïa ka PFR FA. Ha ka jingïakhun ka Mawlai SC ka la thep nyngkong lyngba u Manbha Nongkhlaw (3 min) hynrei ka PFR FA ka la pynïakhaid lyngba u Rafield Nongkynrih (23 min) shuwa ba u Pynphyrnai Kharmujai un thep ïa ka kol kaba ar na bynta ka Mawlai ha ka 36 minit ban khur ïa ka namjop.
