Sa ka seng saiñpyrthei All India Trinamool Congress (AITC) ka la takraiñ ïa ka Sorkar MDA ba la ïalam da ka National Peoples Party (NPP) namar ka jingpynslem ban pyntreikam ïa ka aiñ Meghalaya Residents Safety and Security Act (MRSSA), 2016 ban pyrkhing ïa ka jingrung jingmih laitluid jong ki briew kiba nabar shapoh ka jylla Meghalaya.
Kane ka jingdawa jong ka AITC kaba shong ha ka liang pyrshah jong ka Ingdorbar Thawaiñ jong ka Jylla ka la jia ruh ha kane ka por ba ka Khasi Students Union (KSU) ka la pynjur ïa ka jingkhynra bad ka jingkyndang naphang ïa ki nongbylla bar jylla kiba wan trei bylla sha kane ka jylla khlem ka Labour License bad ka Work Permit.
Ka jingkylli kaba mih mynta ka long, hato ki shakri ka sorkar ha ka tnat Labour ki la pyndep hok neem ïa la ka jong ka kamram ban pynthikna ba ki nongbylla kiba wan nabar ka jylla ki dei ban da ïoh ïa ka Work Permit. Ha kiba bun ki khep, la ïohsngew ba ki nongbylla kiba wan nabar jylla ki ïoh long paduh, padeng, panah tang hapoh katto katne por ba ki la wan sha kane ka jylla kum ki nongbylla. Hato ka aiñ ka tehlakam neem kum ïa kine?
Ki nongshong shnong ka jylla Meghalaya ki don mynta hapdeng ka jingshaiong hi ngaiñ, naei ki wan rung ki nongbylla nabar jylla haba sha manla ki shnong ki thaw hapoh ki district ka rilum Khasi bad Jaiñtia la ïohi ba ki don ki nongbylla bar jylla katkum ba la ïohi ha ka jingkhynra naphang jong ka KSU ha kine ki khyndiat sngi. Kane ka pynpaw shai ba ka Sorkar hi kam lah ban tehlakam ïa ka jingwan rung kyrthep jong ki briew kiba namarba ka jingbym pyntreikam ïa ka aiñ Meghalaya Residents Safety and Security Act (MRSSA), 2016.
Ka KSU ka ai jingkheiñ ba palat 2500 ngut la beh ïa ki nongbylla bar jylla na ki bynta bapher bapher ka rilum Khasi bad Jaiñtia ha ki jingkhynra jong ki shnat treikam ka KSU ha kine ki khyndiat sngi.
Ka jingpyrta jong ki paidbah nongshong shnong ka jylla ha u snem 2016 ban pynurlong ïa ka jingdawa Inner Line Permit ka la pynkha pynban da ka aiñ Meghalaya Residents Safety and Security Act (MRSSA), 2016 , long thik kumba thung da u phan mih da ka shriew. Ka jingbym lah ban pyntreikam ïa kane ka aiñ ka long thik kumba shet ïa ka ja kaba khawot.
U paidbah hi un dang kynmaw ba ka Sorkar ka la wanrah ruh ïa ka jingpynbeit thymmai ïa ka Meghalaya Residents Safety and Security Act (MRSSA), 2016 , ha u snem 2020 ban shut pynnep ïa ki bniat ba dang luiñ jong kane ka aiñ.
Ka Sorkar ka dei ban sngewthuh ïa ka jingdawa jong ki paidbah namarba ka jingkharoi jong kiwei pat ki jaidbynriew ha kane ka jylla ka la nang kiew na ka sngi sha ka sngi. Ka Meghalaya ka dei ruh kaba don markhap bad u pud u sam jong ka Bangladesh bad manla ka sngi ki briew na ka ri Bangladesh ki prong ban ïoh rung tuh sha kane ka jylla namarba ïa ka khappud ym shym la lah ban ker sainar lut.
Ka jinglynga mynsiem jong ki samla ka long na ka daw ba ka ïohkam ïohjam ha kane ka juk ka la hiran haduh katta katta bad ka jingkharoi jong kiwei ki jaidbynriew hapoh ka jylla ka la buh jingeh ïa ki samla trai jylla ha ka khih ka kamai. Kat shaba phai mynta ki samla ki shem ba ki shah tynjuh la yn shong ruh jhieh, ieng ruh tyngkhuh.
Lada ki nongmihkhmat kiba kren ieid jaidbynriew ha ki rynsan ïalap ilekshon kim ïohi ïa ka jingeh kaba ap ïa ki samla trai jylla kiba ïakynduh jingeh na ka jinghiran kam, kan long lehnoh ei ban kren ieid jaidbynriew tang ban ïoh vote ha ka por ilekshon tang ban ïoh jingmyntoi ïa lade shimet.
