Nongstoiñ, Ïaïong 01: Ha ka step jong ka lah sngi u Blei ha ka por kumba shiphew baje ei ei mynstep, kawei ka kali Swift rong saw kaba don ïa u registration No ML 07 B kaba la ñiah da u Nebelnes na ka shnong Umsaw, kaba dang mih na shaphang Nongstoiñ hynrei haba la poi ha Porsohsat hajan ka ophis jong ka tnad Fisheries, la leit ban tynrah ïa kawei ka trok kaba don ïa u Registration number ML 07 A 6276 kaba la ñiah ñiah da u bah F.Nongsiej na ka shnong Sohpian West Khasi Hills.
Ha katei ka jingïa tynrah jong kitei ki kali u nongñiah jong katei ka swift u la mynsaw jur na ka jingsangah ha u steering na ki bynta ka shadem haduh ba u la prie snam na shyntur. Ha katei ka kali Swift ki don lai ngut kiba shong tang ki shynrang suda uwei u ba shong ha khmat u la mynsaw malu mala.
Katkum ka jingïathuh jong u bah F.Nongsiej u ba ñiah ïa katei ka trok pat, u la ong ba u nongñiah jong katei ka kali Swift u la pynher sted bha bad ha ka por ba u la kiar sharud shu ïoh sngew kynsan jraiñ na ka shaka ba shadien ha kaba katei ka Swift ka la sied shadien kumba san mitar ei ei. Hadien katto katne por la wan poi ki pulit hynrei tang shiphang ki la leit noh katba ïa kitei kiba mynsaw la pynkit noh sha hospital na ka bynta ban phah sumar.
