Shillong, ïaïong 01: Ka United Democratic Party (UDP) Amlarem Unit ka la khot bad wer ïa ki nongkyrshan jong ka UDP ba kin ïawer lem ïa ki paralok ba kin ym don ka jingsngew pher party hynrei ban ai jingkyrshan pura ïa u kyrtong ka Regional Democratic Alliance (RDA) ha ka elekshon Lok Sabha ka ban sa long ha ka 19 tarik, Ïaiong.
Ha ka jingïalang kaba la long dang shen ha ka shnong Pdengshakap u MLA ka UDP na Amlarem Constituency Bah Lahkmen Rymbui uba dei ruh u President u la kyrpad ban pynjop ïa u Bah Robert June Kharjahrin khnang ba kan pynsuk ban treikam ha kaba ïadei bad ki kam pynroi bapher bapher hapoh ka Amlarem Constituency.
U MDC barim Bah Lamdibok Sumer uba long u Vice President jong ka UDP Amlarem Circle Unit bad u Bah Medling Swer uba long u Working President ki la pynsngew hakhmat ka jingïalang ïa ki thong treikam jong ka party bad kumjuh ruh ka jingpyntyllun ïa ki kam nangne shakhmat ban pynkhreh ïa ka elekshon Lok Sabha.
U Adviser jong ka UDP Amlarem Unit Bah Kolmen Pohshna u la kyrpad ïa ki paidbah ka Amlarem Constituency ba kin ïasnohkti lang kumba la paw ha kine ki san snem ba ladep lyngba ka jingtrei shitom jong u MLA ban wanrah ïa ki song pynroi bad ban kyntiew ïa ka thaiñ ha kaba ïadei bad ka jingwanrah ïa ki Govt. LP School Building, ka umbam umdih, ka ïohkam ïohjam, ki lynti ki synkien bad kiwei kiwei ki jingdonkam jong u paidbah.
“Nga kyrpad ïa ki paidbah ba kin klet ïa kino kino ki jingsngew party bad ban ai jingkyrshan pura kumba la bthah da u MLA khnang ba u kyrtong ka RDA un long u MP uba lah ban wanrah ki jingkylla ha ka Jylla hi baroh kawei,” u la ong.’
“U Bah Robert June Kharjarin u dei u kyrtong uba dang thymmai bad u bym pat don ïa kano kano ka dak thohbria long u Candidate ba dang thymmai u bym pat don kano ka jingthoh bria,” u la ong bad bynrap, “ka RDA ka la jied ïa u kyrtong uba kynsai bad uba la don ka jingnang jingstad bad ka jingshemphang uba lah ruh ban ïasaid ïa ka khia ka shon jong ka jylla ha Parliament.”
