Khliehriat, ïaiong 27: Ka samla lud kaba dang 16 snem kyrta, ka Elad Shylla, kaba na Khliehriat East, East Jaiñtia Hills District ka la ïoh rah ïa ka nam lahduh ha ka jingïakhun karate kaba la pynlong ha Kolkata, ha ka lympung Funakoshi shotokan Karate, kaba dei ka National Level, ka All India Open Championship ba la pynlong myn ha ka 19 tarik bad 20 tarik mynta u bnai ïaïong 2025.
Shuh shuh ka samla Elad Shylla ka la shah jied ruh ban leit ïashim bynta sa sha kawei ka lympung ka ban sa long ha Maharashtra ha u bnai nailar bad nalor kane la jied ruh ïa ka ba kan leit mihkhmat na ka ri India sa sha ri Malaysia kaba dei ka International Level.
Kum ban shu pashat jingtip, ka samla Elad Shylla, ka khun jong i kongTreiuty Shylla bad u kpa u bah Foresting Lyngdoh ka dei kaba ju mihkhmat ruh na ka jylla Karnataka bad ka ju ïoh rah nam jingjop ha man la ki jingïakhun, mynta ka kynti katei ka samla lyngba ka jingïarap u Deputy Commissioner ka East Jaiñtia Hills District, u Shivansh Awasthi, IAS, ka District Sports Officer, East Jaintia Hills District, ka kong Stefanie Rapsang bad ka MLA jong ka Sutnga Saipung Constituency, ka kong Santa Mary Shylla ka la ïoh ka lad ban mihkhmat na ka jylla Meghalaya bad lyngba ka jingjop jong ka kum ka lahduh ka la wanrah nam sa ïa ka jylla Meghalaya.
Kum ka jingpashat jingtip, ka samla Elad Shylla ka la lah ïoh rah ïa ka nam lah duh ha ka jingïakhun karate/martial arts ha ka lympung jong ka 7th National Level open invitational, Tulunadu Karate Championship 2025 ba la pynlong ha Udyavara Grama Panchayath Stadium, Karnataka bad nalor kane ka la rah ruh bun tylli ki trophy bad ki medal ha ki lympung ïakhun bapher bapher.
Ka Elad Shylla ka la sdang ban ïalehkai karate naduh ka por ba ka dang don 11 snem kyrta ha kaba ka la ïoh ka jinghikai kaba paka na ka skul ba ka pule, ka Bhagawan Shri Sathya Sai Vidya Kendra (E.M) Chokkady, Karnataka bad ka la ïoh ruh ka lad ban pynpaw pyrthei ïa ka sap ha ki rynsan bapher bapher ha ka jingïakhun karate/Martial Arts bad ka la ïoh rah bun tylli ki trophy bad ki medal ruh ha ki Acadamic Sports and Games ba la pynlong ha skul ba ka pule ha karnataka, mynta katei ka samla ka dang pule ha ka Govt. College For Girls, Balmatta, Mangaluru bad ha ka rynsan ïakhun martial Arts bad la pynlong da kane ka college ruh, myn ha ka 22 tarik u naiwieng 2024, ka Elad Shylla ka la rah ïa ka nam lahduh bad ïoh khur ïa ki trophy bad ki medal.
Ha kaba ïakren bad u Mawphor, ka samla Elad Shylla ka la ong bad ïathuh ba ha ka por ba ka dang shong class VI ka la sdang ban ïalehkai karate bad ynda ka la poi class XI u nonghikai jong ka u la ailad shuh shuh ïa ka ban leit ïa shimbynta ha ki rynsan ïakhun karate bad kumta ka la poi shaduh ka kyrdan State Level ha ka jylla Karnataka bad ka la lah ban poi shaduh ka National Level, ka 7th National Level Invitational Tuluna Karate Championship ha kaba la rah ïa ka nam lahduh bad dei hangne ba la kyntiew kyrdan ruh ïa ka sha kawei pat ka kyrdan lane ka Belt ha ka jingïalehkai karate.
Ka la ong ruh ba ka dei lyngba ka jingkyrshan u nonghikai jong ka, u Dr P. Anantha Krisha Bhatt bad u coach jong ka, u Santosh Kumar ba ka la lah ban poi shaduh ka kyrdan National Level, kumta ka la ai ka jingkhublei kyrpang ïa kine ki rangbah ki bym ju iehnoh ïa ka ha man la ki lympung ba ka leit ïakhun.
Na ka liang jong katei ka khlur ïalehkai martial Art bad karate kaba na East Jaiñtia Hills District kaba mihkhmat na ka jylla karnataka bad na ka jylla Meghalaya, ka ai ruh ka jingkhublei ba kyrpang ïa u Deputy Commissioner ka East Jaiñtia Hills District, u Shivansh Awasthi, ïa ka District Sports Officer ka East Jaiñtia Hills District, ka kong Stefanie Rapsang bad ka MLA jong ka Sutnga Saipung ka kong Santa Mary Shylla kiba la plie ïa ki lad ki lynti ha kaba ka la ïoh ban leit ïakhun sha ka lympung ba la pynlong ha Kolkata bad ruh ha kane ka kynti ka la mihkhmat na ka jylla Meghalaya kaba dei ka sien ba nyngkong ba ka mihkhmat na ka jylla namar baroh shi kata ka la mihkhmat na ka jylla Karnataka.
Khlem da klet ïa ki nongshong shnong jong ka Khliehriat East, ïa ki nongshong shnong jong ka jylla Meghalaya bad khamtam eh ïa ki nongkitkam bad ki dkhot jong ka Sport Club jong ka Khliehriat East bad ïa ki nongïalam jong ka party BJP kiba na East Jaiñtia Hills District, ka samla Elad Shylla ka la ai khublei kyrpang ïa ki ruh kumjuh kiba la wan peit bad wan jngoh ïa ka ha iïng sah ha Khliehriat East kiba la wan ai ai ki jingkhublei kitbok kitrwiang bad ai mynsiem ïa ka ha shwa ba kan mih na la ïing sha ka jingleit ïakhun jong ka sha nongbah Kolkata.
U kpa jong ka samla Elad Shylla, u bah Foresting Lyngdoh u la ong “kane ka khun jong nga kaba pule ha ka skul Bhagawan Shri Sathya Sai Vidya Kendra ka la ïoh shisha ka jinghikai kaba paka na ka skul namar kane ka skul kam shym la ai ïa ki khynnah tang ka jingnang jingstad ha ka pule puthi hynrei ka ai ruh ïa ki khynnah ïa ki jinghikai kilan met na ka bynta ka koit ka khiah bad ka la ïoh ruh ka jinghikai ha ka jingïalehkai karate lyngba u coach uba na katei ka skul bad u coach u la shem ba kane ka khynnah ka don ka sap ha ka jingïakhun karate/martial arts, nga sngewkmen ban ong ba lyngba ka jingïarap lang ki coach kiba ai jinghikai ïa ka bad kiba ailad ruh ïa ka khun jong nga ba kan nang kiew shakhmat ha ka martial arts”
U bah F.Lyngdoh u la ïathuh shuh shuh ba ka khun jong u naduh ka por ba ka dang pule ha ka kyrdan Upper Primary bad haduh ka Higher Secondary School la ai jinghikai ïa ka bad ka la ju leit ban ïa shimbynta ha ki district level kiba ha Karnataka bad ka ju ïoh rah ïa ka jingjop man ka por, dang myn ha u bnai rymphang ruh jong une u snem 2025 ka dang leit ïa shimbynta ha kawei ka rynsan ïakhun karate kaba don ha karnataka bad ka la poi sha ka thong.
Utei u rangbah u la pynpaw ka jingsngewnguh ïa ki coach kiba ju ai jinghikai ïa ka ha ka martial arts bad u la ai khublei ruh ïa u Deputy Commissioner, u Shivansh Awasthi, ka District Sports Officer ka East Jaintia Hills District, ka MLA Sutnga Saipung ka kong Santa Mary Shylla, kiba la ïarap ba ka Elad ka la ïoh ban mihkhmat na ka jylla Meghalaya kumjuh ruh u la ai khublei ïa ki dkhot jong ka Khliehriat East Sports Club bad ïa ki dkhot bad nongkitkam jong ka party BJP kiba la wan ai mynsiem bad ai ki jingkitbok kitrwiang ïa ka khun jong u hashwa ba kan mih ban leit sha ka lympung ïakhun ba la pynlong ha nongbah Kolkata.
